وزیرِاعظم عمران خان نے کہا ہے کہ قومی ایئرلائن کی بحالی حکومت کی ترجیحات میں شامل ہے۔

تفصیلات کے مطابق وزیرِاعظم عمران خان کی زیر صدارت ہوابازی ڈویژن سے متعلق معاملات پر اجلاس ہوا، جس میں مسافروں کو بین الاقوامی معیار کی سہولیات کی فراہمی کے لئے کیے جانے والے فیصلوں پر عمل درآمد میں پیش رفت کی گئی۔

اجلاس میں ملکی ہوائی اڈوں کے بہتر انتظام اور مستقبل کے لائحہ عمل کا بھی جائزہ لیا گیا جبکہ ہوابازی ڈویژن سے متعلق معاملات، خصوصا پاکستان انٹرنیشنل ائیر لائنز میں حالیہ اصلاحات کے ثمرات  اور ملکی ہوائی اڈوں کے بہتر انتظام کے حوالے سے بات چیت بھی کی گئی۔

چیئرمین پی آئی اے نے وزیراعظم کو بریفنگ دیتے ہوئے کہا کہ دو نئے جہاز پی آئی اے فلیٹ میں شامل کیے گئے ہیں جبکہ  پی آئی اے کے ماہانہ خسارے میں بھی خاطر خواہ کمی آئی ہے۔

  چیئرمین پی آئی اے کا کہنا تھا کہ قومی ائیرلائن میں اصلاحات کے  خاطر خواہ ثمرات سامنے آنا شروع ہو گئے ہیں، قومی ائیر لائنز کی پروازوں میں 47 پروازوں کا اضافہ کیا گیا ہے۔

  چیئرمین پی آئی اے کا مزید کہنا تھا کہ کارکردگی میں مزید بہتری لانے اور ادارے کو منافع بخش ادارہ  بنانے  کے لئے پی آئی اے کی موجودہ انتظامیہ شب و روز مصروفِ عمل ہے۔

اس موقع پروزیرِ اعظم عمران خان نے پی آئی اے میں جاری اصلاحات کے عمل پر اطمینان کا اظہارکرتے ہوئے کہا کہ قومی ایئرلائن کی بحالی اور اسے منافع بخش ادارہ بنانا حکومت کی ترجیحات میں شامل ہے۔

اجلاس میں وزیر ہوابازی غلام سرور، وزیرِ بحری امور سید علی حیدر زیدی، وزیرِ منصوبہ بندی اسد عمر، مشیر خزانہ ڈاکٹر عبدالحفیظ شیخ، معاون خصوصی ندیم بابر، معاون خصوصی سید ذوالفقار عباس بخاری ، چیئرمین سرمایہ کاری بورڈ سید زبیر گیلانی، سیکرٹری ہوابازی شاہ رخ نصرت، چیئرمین پی آئی اے ائیر مارشل ارشد محمود ملک و دیگر سینئر افسران شریک ہوئے۔