موسم میں تبدیلی ہماری طبعیت میں تبدیلی کی وجہ بنتی ہے، کبھی موسم گرم ہو رہا ہے تو کبھی اچانک ٹھنڈ واپس لوٹ رہی ہے۔

ایسے میں بچے ہوں یا بڑے ان کا سینہ جکڑنے لگتا ہے، بچوں اور بڑوں سمیت گھر کے بزرگ بھی وائرل بیماریوں میں مبتلا ہو جاتے ہیں، جس میں سب سے عام بیماری کھانسی ہے، یہ تکلیف دہ کھانسی لمبے عرصے تک جان نہیں چھوڑتی اور راتوں کی نیند الگ خراب کرتی ہے۔

لیکن اس سے نجات کے لئے آپ کو ایسے کھانسی کے سیرپ پینے کی کوئی ضرورت نہیں جو پیتے ہی آپ نیند میں اونگنے لگتے ہیں، چند آزمودہ نسخے آزما کر آپ باآسانی کھانسی سے نجات پا سکتے ہیں۔

ماہرین جڑی بوٹیوں کے مطابق کھانسی کے علاج کے لیے ہر گھر کے کچن میں موجود غذائیت سے بھرپور اجزاء السی کے بیج، میتھی دانہ اور کلونجی نہایت مفید ثابت ہوتی ہے، ان اجزا کے استعمال سے نا صرف کھانسی کا علاج ہوتا ہے بلکہ پیٹ کی چربی کا بھی جَلد ختم ہو جاتی ہے۔

ماہرین کے مطابق اِن تینوں اجزا سے بنے قہوے کا استعمال نا صرف کھانسی دور کرتا ہے بلکہ متعدد دیگر موسمی بیماریوں سے بھی بچاتا ہے ۔

کھانسی کے علاج کے لئے قہوہ بنانے کا طریقہ

بلغمی یا سوکھی کھانسی سے نجات حاصل کرنے کے لیے ایک چمچ میتھی دانہ، ایک چمچ السی کے بیج اور ایک چوتھائی چمچ کلونجی لے لیں۔

اب ان تینوں اجزاء کو 3 کپ گرم پانی میں شامل کریں اور زیادہ سے زیادہ 4 منٹ تک پکائیں۔

اس کے بعد چولہا بند کر دیں اور نیم گرم ہونے پر یہ قہوہ نتھار کر محفوظ کر لیں۔

اس قہوے کا استعمال دن میں دو بار (نیم گرم) کریں، اس قہوے کو چھان کر فریج میں ایک سے دو دن تک محفوظ بھی کیا جا سکتا ہے۔

ماہرین کی جانب سے تجویز کیے گئے اس قہوے کے استعمال سے ہر قسم کی کھانسی میں آرام ملنے سمیت سردی سے بھی بچا جا سکتا ہے۔