پاکستان مسلم لیگ (ن) کی ترجمان مریم اورنگزیب نے کہا ہے کہ ‎مریم نواز پر آج تک ایک بھی الزام ثابت نہیں ہوا، ‎مریم نواز کیوں اپنے والد کی تیمارداری کرنے نہ جائیں۔

تفصیلات کے مطابق مریم اورنگزیب نے اپنے جا ری کر دہ بیا ن میں کہا ہے کہ ‎نالائق اور نااہل حکومت کی پریشانی 22 کروڑ عوام نہیں ،‎عمران صاحب کو دن رات صرف نواز شریف، شہباز شریف، مریم نواز، حمزہ شہباز اور مسلم لیگ (ن) کا خیال ستاتا رہتا ہے۔

مریم اورنگزیب نے کہا کہ ‎سرکاری خرچ پر نیب اور پی آئی ڈی کو صرف نوازشریف، شہباز شریف، مریم نواز، شریف خاندان اور مسلم لیگ (ن) کے خلاف سیاسی انتقام کے لئے استعمال کیا جا رہا ہے، ‎سیلیکٹڈ وزیراعظم اور دو درجن ترجمان کا مسئلہ مہنگائی، معشیت کی بدحالی ، عوام کا کاروبار اور روزگار نہیں۔آپ کے گھبرانے کا وقت آگیا۔

‎ترجمان مسلم لیگ ن نے کہا کہ فارن فنڈنگ اور بی آر ٹی کھڈے کیس میں پوری پی ٹی آئی کا نام ای سی ایل میں شامل ہونا چاہئے، ‎پارلیمان اور پی ٹی وی پر حملہ، مالم جبہ کیس میں عمران صاحب کا نام ای سی ایل میں ہونا چاہئے۔

مریم اورنگزیب نے کہا کہ ‎مریم نواز پر ابھی تک کوئی ریفرنس دائر نہیں ہوا، مریم نواز نے کبھی کوئی سرکاری عہدہ نہیں رکھا، گرفتار کرنے کے لئے الزام لگایا کہ دادا نے پوتی کو جائیداد میں حصہ کیوں دیا، مریم نواز کو لاہور ہائی کورٹ نے میرٹ پہ ضمانت دی۔

انھوں نے کہا کہ ‎مریم نواز تین مہینے نیب کی حراست میں رہیں لیکن نیب کوئی کرپشن ثابت نہیں کر سکا، ‎مریم نواز نے نیب عدالت میں اپنے والد کے ساتھ 130 سے زیادہ پیشیوں پر روزانہ کی بنیاد پر حاضر ہوئیں۔

‎مریم نواز پرآج تک ایک روپے کی کرپشن ثابت نہیں ہو سکی‎، مریم نواز عدالتی فیصلے کے بعد اپنی والدہ کو بسترِ مرگ پہ چھوڑ کر وطن واپس آئیں، حکومتی ترجمان اپنے بیانات سے زیرِ سماعت مقدمے پہ اثر انداز ہونے کی کوشش کر رہی ہیں۔