کراچی: دوسرے ٹیسٹ میچ پاکستان کی بیٹنگ لائن بری طرح سے ناکام ہوگئی ہے۔

کراچی کے نیشنل اسٹیڈٰیم میں پاکستان اور آسٹریلیا کے درمیان دوسرا ٹیسٹ میچ جاری ہے جس کے تیسرے دن کا کھیل آج کھیلا جارہا ہے۔

آسٹریلیا نے اپنی پہلی اننگ 556 رنز 9 وکٹوں کے نقصان پر ڈکلیئر کردی تھی جس کے بعد پاکستان ٹیم نے بیٹنگ کا آغاز کیا توپاکستان کی پوری ٹیم محض 53 اوورز ہی کھیل سکی اور148 رنز پر ڈھیر ہوگئی ہے۔

آسٹریلیوی ٹیم کو پاکستان پر 408 رنز کی برتری حاصل ہے جبکہ آسٹریلیا نے اپنی دوسرے اننگ کا بھی آغاز کردیا ہے۔

پاکستان کی پہلی اننگ

پاکستان کی جانب سے اوپنر امام الحق اور عبداللہ شفیق نے اننگ کا آغاز کیا لیکن دونوں کھلاڑی ہی بڑی اننگ کھیلنے میں ناکام رہے اور عبداللہ شفیق 13 رنز جبکہ امام الحق 20 رنز بناکر پویلین لوٹ گئے۔

اظہر علی 20 رنز بناکر کیچ دے بیٹھے تو اگلی ہی گیند پر فواد عالم بھی ایل بی ڈبلیو ہوگئے جس کے بعد وکٹ کیپر محمد رضوان 6 بناکر چلتے بنے۔

قومی ٹیم کے کپتان بابر اعظم 36 رنز بنا کر نمایاں رہے جبکہ نعمان علی 20 اور شاہین شاہ آفریدی 19 رنز بناکر آؤٹ ہوئے۔

آسٹریلیا کی جانب سے مچل اسٹارک نے تین کھلاڑیوں کو آؤٹ کیا اور مچل سوئپسن نے دو وکٹیں حاصل کی۔

آسٹریلوی بولر پیٹ کمنز، نتھن لیون اور کیمرون گرین نے ایک ایک کھلاڑی کو آؤٹ کیا جبکہ پاکستان کے دو کھلاڑی رن آؤٹ ہوئے۔

آسٹریلیا کی پہلی اننگ

آسٹریلیا نے اپنی پہلی اننگ 9 کھلاڑیوں کے نقصان پر 556 رنز پر ڈکلیئر کردی تھی جبکہ ان کی جانب سے عثمان خواجہ 160 رنز بناکر نمایاں رہے۔

آسٹریلیا کی جانب سے ایلکس کیری نے 93 اور اسٹیو اسمتھ نے 72 رنز کی بڑی اننگ کھیلی تھی جبکہ پاکستان کی جانب سے فہیم اشرف اورساجد خان نے دو دو کھلاڑیوں کو آؤٹ کیا تھا۔

علاوہ ازیں پاکستان کی جانب سے شاہین آفریدی، حسن علی، نعمان علی اور کپتان بابر اعظم نے ایک ایک کھلاڑی کو آؤٹ کیا تھا۔