پاکستان اور آسٹریلیا کے درمیان سیریز کا تیسرا اور آخری ٹیسٹ 21 مارچ سے قذافی اسٹیڈیم لاہور میں شروع ہوگا، جس کے لیے سیکیورٹی انتظامات مکمل ہوگئے ہیں۔

لاہور کے سربراہ پولیس فیاض احمد دیو نے کہا کہ لاہور پولیس آسٹریلین کرکٹ ٹیم کو 24 سال بعد لاہور آمد پر خوش آمدید کہتی ہے، آسٹریلین و قومی کھلاڑیوں، آفیشلز اور شائقین کرکٹ کو بھرپور سکیورٹی فراہم کریں گے۔

سربراہ پولیس فیاض احمد دیو نے ہدایت دی کہ آخری ٹیسٹ، ممکنہ ون ڈے اور ٹی ٹونٹی میچز کے دوران 08 ہزار سے زائد پولیس افسران اور اہلکار تعینات ہونگے ٹیموں کی ائیر پورٹ سے ہوٹل اور اسٹیڈیم میں نقل وحرکت کے دوران سیکیورٹی و ٹریفک انتظامات مکمل رکھے جائیں گے۔

انکا کہنا تھا کہ ٹیموں کے روٹ، رہائش گاہ، اسٹیڈیم کی سی سی ٹی وی کیمروں کی مدد سے مسلسل مانیٹرنگ کی جائے گی، سینئر پولیس افسران روٹ کھلاڑیوں کی رہائش گاہ اور اطراف میں سکیورٹی انتظامات کا خود جائزہ لیں۔

سی سی پی او لاہور فیاض احمد دیو نے کہا کہ تعینات پولیس افسران و اہلکار انتہائی الرٹ رہیں، مشکوک افراد سرگرمیوں پر کڑی نظر رکھیں جبکہ سی ٹی او لاہور ٹریفک بہاؤ کاجائزہ لیں،شہریوں کے لئے ٹریفک ایڈوائزری پر عملدرامد یقینی بنائیں۔

انکا مزید کہنا تھا کہ پولیس افسران ضلعی انتظامیہ، دیگر سیکیورٹی اداروں کے ساتھ مکمل رابطے میں رہیں اور ڈولفن، پی آریو،ایلیٹ ودیگر ٹیمیں روٹ اور نجی ہوٹل کے اطراف موثر پٹرولنگ کریں۔

سی سی پی او نے بتایا کہ پاک آسٹریلیا کرکٹ سیریز کے پیش نظر شہر بھر میں سرچ اینڈ سویپ آپریشنز بھی جاری ہیں۔