وفاقی حکومت نے امپلائز اولڈ ایج بینیفٹس انسٹیٹیوشن(ای او بی آئی) کے تحت پینشن لینے والے افراد کی پینشن 6 ہزار 500روپے سے بڑھا کر 8 ہزار 500روپے کرنے کا اعلان کردیا۔

وزیر اعظم کے معاون خصوصی برائے اوور سیز پاکستانی زلفی بخاری نے (ای او بی آئی) پینشن میں 2 ہزار روپے اضافے کا اعلان   کرتے ہوئے کہا کہ نئے سال سے کم از کم پنشن 8 ہزار 500روپے ملے گی۔

انہوں نے مزید کہا کہ ای او بی آئی پینشن کو 15 ہزار روپےتک لے کر جائیں گے۔ ای او بی آئی ملک کی خدمت کرنے والوں کے بڑھاپے کا ذمہ دار  ادارہ ہے۔

زلفی بخاری نے کہا کہ حکومت  وفاقی اداروں کے ماتحت عمارتوں کو استعمال میں لانا چاہتی ہے۔ اس مقصد سے ریونیو میں اضافہ ہوگا۔

انہوں نے کہا کہ ای او بی آئی نے 21 ارب کا ریونیو جمع کیا۔ وزیر اعظم کو کمپنیوں میں کام کرنے والے ملازمین کی فکر ہے۔

اس حوالے سے وزیر اعظم عمران خان نے سماجی رابطے کی ویب سائٹ ٹوئیٹر پر  جاری بیان میں کہا کہ پنشن میں اضافہ ریاست مدینہ کی جانب ایک اور اہم قدم ہے۔

ہماری حکومت نے1 سال میں EOBI کے بوڑھے پنشنرزکوملنےوالی رقم 62% اضافے کیساتھ 5250 سےبڑھاکر8500 روپےکردی ہےجس سے پنشنرزکو ریٹائرمنٹ کےبعد کے ایام میں مالی تحفظ فراہم کرنےمیں مدد ملےگی۔ اس سرمائے کاکثیرحصہ خود ادارے کی اصلاح سےحاصل ہورہاہے۔ ریاست مدینہ کی جانب یہ ایک اور اہم قدم ہے۔

— Imran Khan (@ImranKhanPTI) December 12, 2019

انہوں نے کہا کہ تحریک انصاف کی حکومت نے ایک سال میں ای او بی آئی کے  پنشنرز کو ملنے والی رقم 62 فیصد اضافے کے ساتھ 8500 روپےکردی ہے جس سے پنشنرز کو ریٹائرمنٹ کے بعد کے ایام میں مالی تحفظ فراہم کرنے میں مدد ملےگی۔

وزیر اعظم کا کہنا تھا کہ اس سرمائے کاکثیرحصہ خود ادارے کی اصلاح سےحاصل ہورہاہے۔

دوسری جانب وفاقی وزیر اسد عمر نے بھی سماجی رابطے کی ویب سائٹ ٹوئیٹر پر جاری بیان میں کہا کہ کم آمدنی والے ای او بی آئی کے پنشنرز کی پینشن میں 2 ہزار روپے ماہانہ اضافہ کیا گیا ہے۔

کم امدنی والے ای او بی ائ کے پنشنرز کی پنشن میں 2 ہزار روپے ماہانہ اضافہ. پچھلے 15 ماہ میں مجموعی طور پر حکومت نے ان پنشن میں 62٪ اضافہ کیا ہے. pic.twitter.com/x6gRHLaHux

— Asad Umar (@Asad_Umar) December 12, 2019

انہوں نے کہا کہ پچھلے 15 ماہ میں مجموعی طور پر حکومت نے  ای او بی آئی پینشن میں 62 فیصد اضافہ کیا  ہے۔