بھارتی کرکٹ ٹیم کے سابق ہیڈ کوچ روی شاستری نے نوجوان تیز گیند باز عمران ملک کے بارے میں بڑا بیان دیا، جب تیز گیند باز نے راجستھان رائلز کے خلاف شاندار کارکردگی کا مظاہرہ کیرتے ہوئے 39 رنزکے عوض 2 شکار کیے۔

تفصیلات کے مطابق روی شاستری نے ایک اسپورٹس شو میں بات کرتے ہوئے کہا کہ عمران کے پاس بھارتی کھلاڑی کی تمام تر صلاحیتیں ہیں لیکن انہیں مناسب طریقے سے سنبھالنے کی ضرورت ہے۔

انہوں نے کہا کہ میرے خیال میں اس لڑکے کے پاس ٹیلنٹ ہے اس کے پاس حقیقی رفتار ہے اور اگر وہ صحیح جگہوں پر ہٹ کرتا ہے تو وہ بہت سے بلے بازوں کو پریشانی میں ڈالے گا۔

شاستری نے کہا کہ یہ اسے صحیح طریقے سے سنبھالنے کے بارے میں ہے، یہ وہ پیغامات ہیں جو آپ اسے دیتے ہیں، یہ وہ طریقہ ہے جس سے آپ بات کرتے ہیں۔

شاستری نے کہا کہ اس کی صلاحیت میں کوئی شک نہیں ہے جب وہ تیار ہو گا، صرف وقت ہی بتائے گا، لیکن وہ بات چیت کا حصہ انتہائی اہم ہے اسے احتیاط کے ساتھ سنبھالا جانا چاہیے ۔

جب ان سے پوچھا گیا کہ اسے کس طرح سنبھالا جانا چاہئے شاستری نے کہا کہ تیز گیند باز کو بھارتی  ٹیم کے لئے نیٹ باؤلر کے طور پر شامل کیا جاسکتا ہے تاکہ وہ ٹیم کی ثقافت کا احساس حاصل کرسکیں۔

ان کا کہنا تھا کہ عمران ملک پر سلیکٹرز کو کڑی نظر رکھنا ہوگی،جتنا ہو سکے اس کی قدر کریں۔

واضح رہے کہ عمران ملک ان کھلاڑیوں میں سے ایک تھے جنہیں سن رائزرز حیدرآباد نے آئی پی ایل میگا نیلامی سے قبل برقرار رکھا تھا۔