پاکستان کی متنازع ٹک ٹاک اسٹار حریم شاہ نے کہا ہے کہ مسجد نبویﷺ میں پیش آنے والے واقعے میں چیئرمین پی ٹی آئی عمران خان کا کوئی ہاتھ نہیں ہے۔

حال ہی میں حریم شاہ نے نجی ٹی وی چینل کو ایک انٹرویو دیتے ہوئے بتایا  کہ جس وقت مسجد نبویﷺ میں افسوسناک واقعہ پیش آیا وہ وہیں موجود تھیں اور اُنہوں نے سب اپنی آنکھوں سے دیکھا ہے۔

انہوں نے کہا کہ اس واقعے کی جتنی مذمت کی جائے کم ہے اور اس جگہ تو ہمیں آوازیں پست رکھنے کا حکم دیا گیا ہے۔

ٹک ٹاکر نے کہا کہ نئی حکومت کے لیے عوام کے دلوں میں شدید غم و غصہ ہے اور جب حکومت وفد مسجد نبویﷺ پہنچا تو وہاں موجود قافلے نے اپنے غصے کا اظہار کیا جوکہ غلط تھا۔

حریم شاہ کا کہنا تھا کہ اب کہا جارہا ہے وہ قافلہ عمران خان نے بھیجا تھا اور اس سارے واقعے کے پیچھے بھی عمران خان کا ہی ہاتھ تھا جبکہ یہ جھوٹا الزام ہے، عمران خان عاشقِ رسولﷺ ہیں اور وہ کبھی اس طرح کی گھٹیا حرکت میں ملوث نہیں ہوسکتے۔

اُنہوں نے کہا کہ سابق وزیراعظم عمران خان سچے لیڈر ہیں۔

یاد رہے کہ حال ہی میں مسجد نبویﷺ میں سیاسی مخالفت کے جنون میں مذہبی تقدس کی پامالی کی گئی تھی۔

مسجد نبویﷺ کی زیارت کے موقع پر بعض افراد کی جانب سے کابینہ اراکین کے خلاف نعرے بازی کی گئی جس پر سیاست سمیت ہر شعبے سے تعلق رکھنے والے افراد کی جانب سے مذمت کا سلسلہ جاری ہے۔