پی ٹی آئی رہنما فواد چوہدری نے کہا ہے کہ نئے انتخابات سے ہی ملک میں سیاسی استحکام ممکن ہوسکتا ہے۔

پی ٹی آئی رہنما فواد چوہدری نے اسلام آباد میں پریس کانفرنس سے خطاب کرتے ہوئے کہا کہ یاسمین راشد جیسی خاتون اور دیگر پی ٹی آئی رہنماؤں کو  دہشتگردی کی دفعات میں گرفتاری کے آرڈرز جاری کیے گئے جو قابل مذمت ہیں۔

انہوں نے بتایا کہ کبھی پاکستان کی تاریخ میں کسی حکومت نے اپنے سیاسی مخالفین کو توہین مذہب کے مقدمات میں بک نہیں کیا۔

 ان کا کہنا تھا کہ اس حکومت نے اپنے سیاسی مخالفین کو توہین مذہب کے مقدمات میں بک کیا ہے ۔

فواد چوہدری کا کہنا تھا کہ حکومت کو لگتا ہے کہ ریڈ زون بہت مقدم جگہ ہے جہاں کسی عام آدمی کا داخلہ ممنوع ہے۔

ان کا کہنا تھا کہ اگر یہ ریڈ زون کو مقدم سمجھتے ہیں تو آدھی رات میں لوگوں کے گھروں میں گھس کر عورتوں کے ساتھ جو بدتمیزی کی گئی اور چادر و چار دیواری کا تقدس پامال کیا گیا اسکی رپورٹ ہمیں چاہیئے۔

ریڈ زون کی اہمیت نہیں ہے کیونکہ اصل رپورٹ لوگوں کے گھروں پر چھاپوں کی ہوگی جس کا چارج حکومت کو لینا ہے۔

فواد چوہدری نے کہا کہ عوام سپریم کورٹ کی طرف دیکھ رہے ہیں۔

انہوں نے کہا کہ آج سیشن کورٹ میں ایک جج نے جراءت کا مظاہرہ کیا اور رانا ثناء اللہ کے خلاف پرچہ درج کیا ۔

ان کا کہنا تھا کہ ملک کی سب سے بڑی سیاسی جماعت کے ساتھ اس قسم کا سلوک عوام برداشت نہیں کریگی۔