پاکستان تحریک انصاف کے مرکزی سیکرٹری اطلاعات فرخ حبیب نے کہا ہے کہ امپورٹڈ حکومت کا اقتدار میں آنے کا مقصد صرف این آر او لینا ہے ان کی ترجیح عوامی مفاد کے بجائے ذاتی مفاد ہے۔

فرخ حبیب نے پریس کانفرنس کرتے ہوئے کہا کہ جھوٹوں کا ٹولہ جمع ہوگیا ہے لیکن اس کو سمجھ نہیں آرہا کہ کرنا کیا ہے، یہ ہر روز جھوٹ بول رہے ہیں۔

انہوں نے کہا کہ امپورٹڈ حکومت نے ملک کو تباہی کے دھانے پر پہنچا دیا ہے اور جو ریلیف یکم اپریل کو دینا تھا وہ جولائی میں چلا گیا ہے ۔

انہوں نے مزید کہا کہ اسوقت اسمبلی کی حالت کسی سے ڈھکی چھپی نہیں ہے، موجودہ حکومت نےاسمبلی کی اہمیت ختم کردی ہے۔

فرخ حبیب کا کہنا تھا کہ پی ڈی ایم آئی ایم ایف کابجٹ پیش کیا گیا جس میں اب تک تین تبدیلیاں کر چکے ہیں۔

انہوں نے بتایا کہ یوٹیلٹی اسٹورز میں سب سے زیادہ 24ارب کی سبسڈی عمران خان نے دی، کسانوں کو ریلیف دینے کیلئے قانون سازی اپنے دور میں کروائی، ٹیکسٹائل انڈسٹری کو بحال کروایا اور 55لاکھ نوکریوں کے مواقع ہم نے فراہم کیے اسکے علاوہ عمران خان کا احساس پروگرام دنیا میں چوتھے نمبر پر آیا تھا۔

ان کا کہنا تھا کہ ملک اچھا خاصا چل رہا تھا کہ این آر او لینے والوں کو بیٹھا دیا گیا، شہباز شریف جعلی اور امپورٹڈ وزیراعظم بن گئے جس میں وہ بہترین ایڈمنسٹریٹر کی بجائے بدترین ثابت ہوئے۔

انہوں نے کہا کہ یہ خود منی لانڈرنگ کرتے ہیں، چیری بلاسم سے جوتے پولش کرتے ہیں اور آئندہ چیری بلاسم کےنشان پر اکٹھے الیکشن لڑیں گے۔

فرخ حبیب نے بتایا کہ انہوں نے نیب کو اپنے تابع کر دیا گیا ہے لیکن ہم نیب قانون میں ترامیم کوسپریم کورٹ میں چیلنج کریں گے۔

ان کا کہنا تھا کہ فوری انتخابات ملک کیلئے ضروری ہیں لیکن معلوم نہیں کہ انہیں کس چیز کا خوف ہے اور یہ الیکشن کروانے سے کیوں ڈرتے ہیں ۔