امیر جماعت اسلامی سراج الحق نے کہا ہے کہ کرپشن کی وجہ سے پاکستان تباہ ہو رہا ہے۔

سودی معیشت، مہنگائی اور آئی ایم ایف کی غلامی کے خلاف جماعت اسلامی کا تین روزہ ٹرین مارچ ملتان روانگی سے قبل سراج الحق نے میڈیا سے گفتگو کرتے ہو کہا کہ ٹرین مارچ غریب عوام کے لیے ہے۔

انہوں نے کہا کہ جنوبی پنجاب کی نہروں میں پانی خشک ہے فصلیں تباہ ہو رہی ہیں، آج ڈگری ہولڈرز بے روزگار ہیں نوکری نہیں مل رہیں۔

سراج الحق نے کہا کہ آج ملک میں پی ڈی ایم اور پی ٹی آئی کا مقابلہ ہے، ایک نالائق اور ایک سپر نالائق ہے، پی ڈی ایم اور پی ٹی آئی میں جھوٹ اور نالائقی کا مقابلہ ہے، یہ کرپٹ مافیا، آٹا مافیا اور ڈرگ مافیا کے نمائندہ ہیں۔

امیر جماعت اسلامی کا کہنا ہے کہ مہنگائی کے ان حالات میں غریب عوام کیا کرے، مہنگائی کی وجہ سے جرائم میں اضافہ ہوا ہے، کیا فرق ہے شہباز شریف، عمران خان اور آصف زرداری میں۔

انہوں نے کہا کہ کرپشن کی وجہ سے پاکستان تباہ ہو رہا ہے، 15 فیصد سرکاری ملازمین کی تنخواہوں میں اضافہ کیا مگر 45 فیصد بلوں میں اضافہ کر دیا، اس حکومت نے پیٹرول کو سونے کے برابر بنا دیا۔

سراج الحق نے کہا کہ پی ڈی ایم کرپٹ اور جاگیرداروں کا کلب ہے، پی ٹی آئی اور پی ڈی ایم کی ایک ہی پالیسی ہے کھاؤ پیو عیش کرو، کشمیر کو بیچنے میں پی ٹی آئی اور پی ڈی ایم برابر کی شریک ہیں۔

انہوں نے مزید کہا کہ ہم بغاوت کا اعلان کرتے ہیں، آئی ایم ایف کی مان کر عوام کو نچوڑ دیا گیا ہے، حکمرانوں کو شرم نہیں آتی جلسے کرتے ہیں، ان لوگوں نے نظریہ پاکستان کے ساتھ بے وفائی کی ہے۔