وزیراعظم عمران خان نے کہا ہے کہ بھارتی حکومت کی آر ایس ایس کے نظریے پر مبنی پالیسیوں کی وجہ سے علاقائی امن کو شدید خطرات کا سامنا ہے۔

تفصیلات کے مطابق  اسلام آباد میں ورجینیا یونیورسٹی کے ایک وفد سے گفتگو کرتے ہوئے وزیراعظم عمران خان نے کہا کہ بھارتی حکومت کی فسطائی پالیسیوں سے خود بھارتی عوام کی شناخت خطرہ میں ہے۔

عمران خان نے کہا کہ موجودہ حکومت اقلیتوں کے حقوق کے تحفظ پر پختہ یقین رکھتی ہے اور انہیں ملک کا مساوی شہری تصور کرتی ہے۔

ملک کی معاشی صورتحال کے بارے میں وزیراعظم نے کہا کہ تحریک انصاف کی حکومت کی بھرپور کوششوں سے معیشت مستحکم ہوگئی ہے اور معاشی اشاریوں میں واضح بہتری آئی ہے۔

عمران خان نے  مقبوضہ کشمیر میں150 سے زائد دنوں سے کرفیو کی شدید مذمت کرتے ہوئے کہا کہ ان مظالم نے بھارتی حکومت کے جمہوریت کے دعوئوں کو بے نقاب کر دیاہے۔

وزیراعظم عمران خان نے ننکانہ صاحب واقعے کا نوٹس لے لیا

وزیراعظم عمران خان نے مزید  کہا کہ حکومت یکساں نظام تعلیم متعارف کرانے کیلئے کوششیں کررہی ہے تاکہ موجودہ نظام تعلیم سے پیدا ہونے والی سماجی تفریق مٹائی جاسکے۔

واضح رہے گزشتہ روز وزیراعظم عمران خان نے  کشمیریوں کے خود ارادیت کے حق میں  قرار داد کے 71ویں سال کے موقع پر اپنے ایک پیغام میں کہا تھا کہ ہر سال 5 جنوری کو ہم کشمیریوں کے بنیادی انسانی حقوق کو برقرار رکھنے کے عزم کا اعادہ کرتے ہیں،اس دن آزادانہ رائے شماری کے ذریعے کشمیریوں کو حق خودارادیت دینے کاعہد کیاگیا۔

وزیراعظم نے کہا تھا کہ یہ دن عالمی برادری خصوصاً اقوام متحدہ کو  کشمیریوں سے کیا وعدہ یاد دلاتا ہے کہ حق خود ارادیت کے حصول تک پاکستان کشمیری عوام  کی اخلاقی ،سیاسی ، سفارتی  مدد جاری رہے گی۔

عمران خان  نے  یہ بھی کہا تھا کہ بھارت میں مسلمانوں پر تشدد کی حالیہ لہرمودی حکومت کا آرایس ایس ایس نظریہ ہے جبکہ مقبوضہ کشمیر میں ریاستی دہشتگردی اوراقلیتوں پرتشدد ہندووتوا نظریہ کامظہرہے۔