لاہور: دورہ سری لنکا سے فارغ ہونے کے بعد قومی کرکٹ ٹیم وطن واپس پہنچ گئی ہے۔

تفصیلات کے مطابق وطن واپس پہنچنے کے بعد کپتان بابر اعظم سمیت لاہور سے تعلق رکھنے والے کھلاڑی گھروں کو روانہ ہوگئے ہیں۔

اظہر علی، امام الحق، نسیم شاہ اور فہیم اشرف لاہور پہنچ گئے ہیں جبکہ عبداللہ شفیق، شاہین شاہ آفریدی، شان مسعود اور سلمان علی آغا بھی لاہور پہنچ گئے ہیں۔

          واضح رہے کہ قومی کرکٹ ٹیم نے سرہ لنکا کا دورہ کیا ہے جس موقع پر دونوں ٹیموں کے درمیان 2 ٹیسٹ میچز پر مشتمل سیریز کھیلی گئی۔

سیریز بے نتیجہ رہی اور دونوں ٹیمیں ایک ایک میچ جیتنے میں کامیاب رہی ہیں جبکہ پاکستان نے پہلا ٹیسٹ میچ 4 وکٹوں سے اپنے نام کیا تھا۔

دوسرے ٹیسٹ میچ میں قومی ٹیم کو بدترین شکست کا سامنا کرنا پڑا جبکہ سری لنکا نے پاکستان کو 246 رنز کے بڑے مارجن سے شکست دی تھی۔

دوسری جانب پاکستان کرکٹ ٹیم کی اگلی سیریز نیدر لینڈز کے خلاف ہے جہاں اسے  تین ون ڈے میچز کھیلنے ہیں۔ پاکستان اور نیدر لینڈز  کے خلاف میچز 16، 18 اور 21 اگست کو  کھیلے جائیں ۔

سیریز کے لیے قومی  ون ڈے اسکواڈ کا اعلان آئندہ ہفتے ہو گا  اور اگست کے دوسرے ہفتے میں ٹیم نیدرلینڈز روانہ ہوگی جبکہ نیدرلینڈز روانگی سے قبل مختصر دورانیے کا تربیتی کیمپ بھی لگایا جائے گا۔