بکنگھم پیلس نےشہزادہ ہیری اوران کی اہلیہ میگھن سےباضابطہ طورپرشاہی خطابات واپس لےلئےہیں۔

برطانوی میڈیا کےمطابق بکنگھم  پیلس سےجاری کئےگئےبیان میں کہاگیاہےکہ ڈیوک آف سسیکس شہزادہ ہیری اور ان کی اہلیہ میگھن اب شاہی خطابات استعمال نہیں کر سکیں گے، جس کے بعد یہ جوڑااب ملکہ برطانیہ کی ناتونمائندگی  کرسکےگااورناہی انہیں شاہی فرائض کی انجام دہی کے لیے ملنے والےعوامی فنڈزدیےجائیں گے۔

بیان میں مزیدکہاگیاہےکہ ہیری اوران کی اہلیہ کاشاہی درجہ ختم  ہونے کے بعد اب  وہ اپنے لیے ‘ہِزرائل ہائنس’ اور‘ہَررائل ہائنس’ کا خطاب بھی استعمال نہیں کرپائیں گے۔

اس کے علاوہ ملکہ برطانیہ نےاپنے بیان میں دونوں کےلیےنیک خواہشات کا اظہارکرتےہوئےکہاہےکہ ہیری، میگھن اور ان کا بیٹا آرچی ہمیشہ خاندان کا اہم حصہ رہیں گے’۔

 بکنگھم پیلیس کےترجمان کا کہنا تھا کہ ‘دونوں میاں بیوی باقاعدہ طور ملکہ کی نمائندگی نہیں کرسکتے ہیں لیکن وہ جو کچھ بھی کریں گے اس میں شاہی اقدار کو ملحوظ خاطر رکھیں گے’۔

رپورٹ کے مطابق شاہی خاندان کے ذرائع کا کہنا تھا کہ شہزادہ ہیری کو سرکاری سطح پرمالی معاونت نہیں دی جائےگےلیکن ان کے والد اور خاندان کے وارث شہزادہ چارلس انہیں نجی سطح پر تعاون جاری رکھیں گے۔

شاہی خاندان کی ذمہ داریوں سےعہدہ برآ ہونےکے بعد شہزادہ ہیری، عسکری سرپرستی اوردولت مشترکہ کے یوتھ ایمبیسڈرکااعزاز بھی واپس کردیں گے۔

واضح رہےکہ چند روز قبل شہزادہ ہیری اور ان کی اہلیہ میگھن مارکل نے  شاہی خاندان کے سینئر فرد کی حیثیت سے دستبرداری کا اعلان کیا تھا۔

شاہی جوڑے نے اپنے بیان میں کہا تھا کہ وہ شاہی پروٹوکول کو چھوڑ کر عام انسانوں کی طرح زندگی بسر کرنا چاہتے ہیں اور اب وہ مستقبل میں اپنے فلاحی و دیگر کاموں پر توجہ دیں گے۔

اس فیصلےکےحوالے سے ڈیوک اورڈچز آف سسیکس نے شاہی خاندان کے کسی بھی رکن سے مشورہ نہیں کیا تھا تاہم ان کے مطابق یہ فیصلہ کئی مہینوں کی سوچ بچارکےبعدسامنےآیا۔