سری نگر: مقبوضہ کشمیر میں تحریک آزادی کے عظیم قائد سید علی گیلانی کی پہلی برسی کے موقع پر وادی میں ہڑتال رہی۔

کشمیر میڈیا سروس (کے ایم ایس) کی رپورٹ کے مطابق بھارت کے غیر قانونی زیر قبضہ جموں و کشمیر میں قابض انتظامیہ نے تحریک آزادی کے عظیم قائد سید علی گیلانی کی پہلی برسی کے موقع پر لوگوں کو سری نگر کے علاقے حیدر پورہ میں انکی قبر پرفاتحہ خوانی سے روکنے کیلئے سخت پابندیاں عائد کررکھی تھیں۔

رپورٹ کے مطابق وادی کشمیر میں کئی مقامات پر چیک پوائنٹس بناکر لوگوں کی تلاشی لی گئی جب کہ حیدر پورہ میں بھی بڑی تعداد میں بھارتی فوجی اور پولیس اہلکار تعینات رہے اور کسی کو بھی علاقے میں داخل ہونے کی اجازت نہیں دی گئی۔

بھارتی فورسز کے اہلکاردکانداروں کو ہڑتال سے باز رکھنے کیلئے اپنی دکانیں کھولنے پر مجبور کرتے رہے لیکن کئی مقامات پر دکانداروں نے احکامات کو خاطر میں نہ لاتے ہوئے اپنی دکانیں بند کر رکھی۔

مقبوضہ علاقے میں سید علی گیلانی کی برسی کے موقع پر ہڑتال کی کال کل جماعتی حریت کانفرنس کی جانب سے دی گئی تھی جب کہ سید علی گیلانی کی روح کے ایصال ثواب کے لیے وادی کشمیر اور جموں خطے کے مختلف حصوں میں دعائیہ نشستیں بھی منعقد کی گئیں تھیں۔

واضح رہے کہ سید علی گیلانی نے گذشتہ برس یکم ستمبر کو سری نگر کے علاقے حیدر پورہ میں اپنی رہائش گاہ پر بھارتی پولیس کی حراست کے دوران شہادت پائی تھی جہاں انہیں ایک دہائی سے زائد عرصے تک مسلسل نظربند رکھا گیا تھا۔