حکومتی وفد نے خالد مقبول صدیقی کو ایک مرتبہ پھر کابینہ میں شمولیت کی دعوت دے دی۔

تفصیلات کے مطابق ایم کیو ایم کے وفد کی اسلام آباد میں جہانگیر ترین کے گھر آمد پر مذاکرات کے تیسرے دور کا آغاز ہوگیا۔

ملاقات میں  ایم کیو ایم وفد کی قیادت کنوینر خالد مقبول صدیقی کررہے ہیں دیگر ارکان میں کنور نوید جمیل اور عامر خان شامل ہیں۔

ذرائع کا کہنا ہے کہ حکومت کی جانب سےخالد مقبول صدیقی کو ایک بار پھر کابینہ میں شمولیت کی دعوت دیتے ہوئے حکومتی وفد نے کہا ہے کہ  خالد مقبول صدیقی کا استعفیٰ منظور نہ کرنے کا فیصلہ کیا گیا ہے جس پر حکومتی وفد کا کہنا تھا کہ نا تو خالد مقبول صدیقی کا استعفا منظور کیا جائیگا اور نہ ہی ان کی جگہ ایم کیو ایم سے کسی کو وزیر بنایا جائیگا۔

ذرائع کے مطابق جلد ہی وزیراعظم اور خالد مقبول صدیقی کی ملاقات کا امکان بھی ظاہر کیا گیا ہے جبکہ ایم کیو ایم اور پی ٹی آئی وفود کے درمیان آئندہ ملاقات بدھ کو ہوگی۔

حکومت اور ایم کیو ایم قیادت میں ہونے والے مذاکرات کے اس تیسرے دور میں حکومتی اتحاد سے متعلق امور ،کراچی پیکیج پر تفصیلی بات چیت ہوئی۔

خالد مقبول صدیقی کا استعفیٰ وزیراعظم کو ارسال

وفاقی وزیر انفارمیشن ٹیکنالوجی خالد مقبول صدیقی کے استعفیٰ کے اعلان کے بعد حکومت اور ایم کیو ایم قیادت میں دو ملاقاتیں کراچی میں ہوچکی ہیں۔

گزشتہ ملاقات کراچی میں ایم کیو ایم کے عارضی مرکز بہادر آباد میں ہوئی تھی، جس میں ڈیڈلاک برقرار رہا تھا اور خالد مقبول صدیقی نے استعفیٰ واپس لینے کا اور نہ ہی حکومت نے تمام شرائط ماننے کا اعلان کیا تھا۔

ایم کیو ایم قیادت نے حکومتی ٹیم کے روبرو اپنے مطالبات اور تحفظات رکھے، جس پر پرویز خٹک کی سربراہی میں موجود ٹیم نے انہیں اگلے مرحلے کے مذاکرات کےلیے اسلام آباد آنے کی دعوت دی تھی۔

واضح رہے کہ چند روز قبل خالد مقبول صدیقی نے احتجاجاً وزارت چھوڑنے کا اعلان کیا تھا، ان کا کہنا تھا کہ میرا اب کابینہ میں بیٹھنا بے سود ہے تاہم حکومت سے تعاون مسلسل جاری رہے گا۔