‎پاکستان مسلم لیگ (ن) کی ترجمان مریم اورنگزیب نے کہا ہے کہ قبضہ مافیا، منافع خور  اور ذخیرہ اندوز عمران صاحب آپ  کے اے ٹی ایم اور دوست ہیں، وہ تو آپ کا کچن چلاتے ہیں۔

‎ ‎تفصیلات کے مطابق پاکستان مسلم لیگ (ن) کی ترجمان مریم اورنگزیب نےاپنے ایک بیان میں  وزیراعظم عمران  خان کے اقدامات کو ڈرامہ اورعوام کے زخموں پر نمک قرا ر دے دیا۔

پاکستان مسلم لیگ (ن) کی  ترجمان نے کہا کہ ‎عمران صاحب عام آدمی کی زندگی مشکل بنانے میں آپ اور آپ کی حکومت نے کوئی کسر نہیں چھوڑی،‎سارے مافیا اور منافع خور آپ کے دائیں بائیں بیٹھے ہیں، ملک وقوم کی پہلے ان سے تو جان چھڑائیں۔

‎اپنے بیان میں مریم اورنگزیب نے عمران خان پر تنقید کرتے ہوئے کہا کہ  پاکستان کے عوام آپ کی نالائق، نااہلی، جھوٹ اور کرپشن کی مزید متحمل نہیں ہوسکتی، عوام کو ریلیف اب صرف عمران صاحب کے رخصت ہونے سےملے گا۔

‎ مریم اورنگزیب  نے یہ بھی کہا کہ عمران صاحب آٹا چینی مافیا نے آپ کے حکم پر ملک میں بحران پیدا کیا، جبکہ آپ  ڈرامہ بازی والے بیانات سے آپ عوام کو بے وقوف نہیں بناسکتے۔

مریم اورنگزیب کا ہنرمند نوجوان پروگرام کے افتتاح پر ردعمل

پاکستان مسلم لیگ (ن) کی ترجمان مریم اورنگزیب نے مزید کہا کہ عمران صاحب اگر منافع خوروں، ذخیرہ اندازوں اور  قبضہ مافیا سے پیچھا چھڑانا ہے تو سب سے پہلے آپ سے پیچھا چھُڑانا پڑے گا ۔

 واضح رہے اس سے قبل بھی پاکستان مسلم لیگ (ن) کی ترجمان مریم اورنگزیب نے وزیراعظم عمران خان کو تنقید کا نشانہ بناتے ہوئے کہا تھا کہ عمران صاحب تقریروں سے روٹی، روزگار اور کاروبار نہیں ملتاہے۔

انہوں نے کہا  تھاکہ عمران صاحب آپ کی تقریروں سے عوام کو روزگار نہیں ملے گا ، مہنگائی کی شرح کم نہیں ہو گی، آپ کی تقریروں سے عوام کو پچاس لاکھ گھر ایک کروڑ نوکری نہیں ملے گی اور نہ ہی آپ کی تقریر سے لوگ بجلی اور گیس کے بل ادا کرنے کے قابل نہیں ہوجائیں گے۔

تنقید کرتے ہوئے ان کا مزید کہنا تھا کہ آپ اپنے دوستوں اور باجی کے لئے نیب ترمیمی آرڈیننس لائے اور سیاسی مخالفین سزائے موت کی چکیاں دی گئی اور صرف سولہ ماہ میں نواز شریف کا چلتا ہوا نوجوان پروگرام بند کیا، پھر سولہ ماہ بعد اُسی پروگرام پہ نئی تختی لگا دی۔