آرمی چیف جنرل قمر جاوید باجوہ کا کہنا ہے کہ آزادی کی جدوجہد میں کشمیری اکیلے نہیں، ہم ان کے ساتھ کھڑے ہیں۔

آرمی چیف جنرل قمر جاوید باجوہ نے یوم یکجہتی کشمیر پر اپنے پیغام میں کہا ہے کہ کشمیری بہن بھائیوں کے حوصلے و ہمت کی داد دیتے ہیں، دنیا کے ضمیر کو جھنجھوڑنے میں اپنا کردار ادا کرتے رہیں گے، کشمیریوں کیلئے غیر متزلزل حمایت جاری رہے گی، کشمیری عوام ثابت قدمی سے بھارتی جبر کا مقابلہ کر رہے ہیں، پائیدار امن ابھی تک ایک خواہش سے زیادہ کچھ نہیں۔

کشمیر ہوں میں ‘ شہہ رگ پاکستان کی

آرمی چیف کا کہنا تھا کہ وادی کشمیر کو جیل میں تبدیل کر کے لاکھوں کشمیریوں کو قید کر دیا گیا ہے، کشمیری اقوام متحدہ سے اپنا حق خود ارادیت مانگ رہے ہیں، مرد، خواتین، بوڑھے اور بچے حق خود ارادیت کے لیے جدوجہد کر رہے ہیں۔

جنرل قمر جاوید باجوہ کا مزید کہنا تھا کہ یوم یکجہتی کشمیر مذموم بھارتی جارحیت کے تناظر میں منایا جا رہا ہے، بھارتی جارحیت کا مقصد کشمیریوں کے حقوق غضب کرنا ہے، اقوام متحدہ کی سلامتی کونسل بھی کشمیریوں کا حق تسلیم کرچکی ہے۔

انہوں نے کہا کہ بھارتی افواج ایل او سی پر اشتعال انگیزیاں کر رہی ہیں، جان بوجھ کر آزاد کشمیر کی شہری آبادی کو نشانہ بنایا جارہا ہے۔

جوانوں اور شہریوں کی لازوال قربانیاں جدوجہد آزادی کو زندہ رکھے ہوئے ہے۔

آرمی چیف کا کہنا تھا کہ پاک فوج اپنے فرائض کی انجام دہی میں مستعد ہے، پاک فوج ہر جارحیت کا مقابلہ کرنے کی صلاحیت اور استعداد رکھتی ہے۔

امن کی خواہش اور بھارت کے ہاتھوں کشمیریوں کے نقصان کے پیش نظر صبر کا مظاہرہ کر رہے ہیں۔