سندھ حکومت   کا کہنا ہے کہ سپریم کورٹ کے  غیر قانونی عمارتوں کو گرانے کے احکامات پر من و عن عمل کریں گے۔

وزیراطلاعات سندھ ناصر حسین شاہ نے میڈیا سے گفتگو کرتے ہوئے کہا کہ کراچی میں تجاوزات کے خلاف آپریشن جاری ہے اور ہم چیف جسٹس کے شہر کی بہتری کے وژن کے ساتھ ہیں۔

وزیر اطاعات سندھ نے  کہا کہ چیف جسٹس کے وژن سے ہمیں رہنمائی ملی ہے۔ پہلے بھی غیر قانونی تعمیرات گرائی گئیں اور اب بھی غیر قانونی تعمیرات کے خلاف ایکشن ہوگا۔

ناصر حسین شاہ نے کہا کہ جس عمارت میں لوگ نہیں رہتے پہلے مرحلے میں انہیں گرایا جائے گا۔جہاں لوگ رہائش پذیر ہیں وہ عمارتیں لوگوں کو متبادل جگہ فراہم کرنے کے بعد گرائیں گے۔

انہوں نے کہا کہ نہر خیام پر ترقیاتی سرگرمیوں پر حکم امتناعی حاصل کیا گیا تھا۔سب میرین چورنگی پر انڈر پاس کے پاس دیگر ترقیاتی کاموں پر بھی اسٹے آرڈر تھا۔ سپریم کورٹ کے حکم کے بعد تمام حکم امتناعی ختم ہوجائیں گے۔

صوبائی وزیر اطلاعات کا کہنا تھا کہ سپریم کورٹ کا حکم ہماری مدد کررہا ہے۔ کراچی بڑا شہر ہے یہاں بہت  سی تعمیرات غیر قانونی ہورہی تھیں،900 سے زیادہ عمارتی ڈھانچوں کو پہلے بھی گرایا گیا تھا۔

ناصر حسین شاہ نے کہا کہ ایس بی سی اے میں نئے نظام کے تحت کام کیا جائے گا۔عالمی بینک کا بھی اس تبدیلی میں تعاون شامل ہے۔ قدیم گوٹھ  اور پرانی آبادیوں کو ریگولرائز کیا جاچکا ہے۔

کراچی تجاوزات: سندھ حکومت کا بلاول بھٹو کے زیر صدارت ہنگامی اجلاس

انہوں نے مزید کہا کہ غیر قانونی تعمیرات کی شکایات ضرور ہیں مگر اس کا ازالہ بھی کیا جارہا ہے، ایس بی سی اے کے ساتھ  مل کر غیر قانونی تعمیرات کرنے والوں کے خلاف ایکشن لیا جائے گا۔

وزیر اطلاعات سندھ کا کہنا تھا کہ  لوگوں کو بے گھر نہیں کرنا چاہتے مگر کسی کو قبضہ بھی نہیں کرنے دیں گے۔ماضی کی آبادی کم تھی، پہلے کے اور آج کے حالات میں فرق ہے، بلڈر مافیا کی وجہ سے  بھی مشکلات کا سامنا کرنا پڑا۔

ناصر حسین شاہ نے امید ظاہر کی کہ سپریم کورٹ غیرقانونی تارکین وطن افراد کے خلاف  بھی کارروائی کا حکم دے گی۔

ان کا مزید کہنا تھا کہ سندھ حکومت کو غیر مستحکم کرنے کی کوشش کی جارہی ہے۔سندھ کو اب بھی 130 ارب روپے کم دیے گئے ہیں جس کا  اثر ترقیاتی سرگرمیوں پر پڑرہا ہے۔

صوبائی وزیر اطلاعات نے کہاکہ کراچی کے 11 نئے منصوبوں پر بھی عمل کرنا ہے، جوہر چورنگی پر بھی فلائی اوور کی تجویز ہے جبکہ جاری منصوبوں کو اسی سال مکمل کرلیا جائے گا۔