حکمراں جماعت تحریک انصاف اور اتحادی جماعت مسلم لیگ ق کے درمیان مذاکرات طے پاگئے ہیں۔

تفصیلات کے مطابق مسلم لیگ ق نے حکومتی مذاکراتی کمیٹی سے ملاقات کے بعد اپنے تمام اختلافات ختم کردیئے ہیں۔

ملاقات میں اتفاق ہوا ہے کہ ق لیگ کے وزرا ،وزارتوں کے معاملات میں بااختیار ہوں گے جبکہ اتحادی جماعت کو ترقیاتی فنڈز بھی جلد جاری کر دئیے جائیں گے اور کسی بھی قابل اعتراض آفیسر کی تقرری پر تحریک انصاف اعتراض کرسکے گی۔

اعتراض پر ق لیگ متعلقہ وزارت میں تعیناتی کے کیے نئے آفیسر کا نام دینے کی پابند ہوگی۔

ملاقات میں یہ بھی طے پایا کہ ترقیاتی فنڈز کے معاملہ پر آئندہ دو روز میں فالو اپ میٹنگ اسلام آباد میں ہوگی جبکہ وفاق کے معاملات پر پرویز خٹک اور اسد عمر عمل کر کرائیں گے اور پنجاب کے معاملات پر وزیر اعلی اور گورنر عمل درآمد کرانے کے پابند ہوں گے۔

وزیر دفاع پرویز خٹک نے کہا ہے کہ پاکستان تحریک انصاف اور پاکستان مسلم لیگ ق کے درمیان اتحاد جاری رہے گا کیونکہ تمام مسائل خوش اسلوبی سے حل کرلئے گئے ہیں۔

لاہور میں پاکستان ق لیگ کی قیادت سے ملاقات کے بعد صحافیوں سے گفتگو کرتے ہوئے وزیر دفاع نے کہا کہ تمام فیصلے باہمی مشاورت سے کئے جائیں گے۔

پنجاب اسمبلی کے سپیکر اور پاکستان مسلم لیگ (ق)  کے رہنما چودھری پرویز الہی نے اس موقع پر کہاکہ ان کی جماعت کو وزیراعظم عمران خان کی قیادت پر مکمل اعتماد ہے اور حکومت کے ساتھ مسائل حل ہوگئے ہیں۔

انہوں نے کہا کہ ہم اتحاد کو آئندہ انتخابات تک برقرار رکھنے کیلئے ہر ممکن کوشش کریں گے۔چودھری پرویز الہی نے کہا کہ ہم ملک کو در پیش مسائل سے نمٹنے کیلئے باہمی مشاورت کے ساتھ آگے بڑھیں گے۔

اس سے پہلے پرویز خٹک، شفقت محمود اور اسد عمر پر مشتمل حکومتی کمیٹی نے پاکستان مسلم لیگ ق کی قیادت کے ساتھ مذاکرات کئے اور مسائل پر تبادلہ خیال کیا۔