چینی وزارت خارجہ نے تصدیق کی ہے کہ ہے چین کے نائب وزیر خارجہ اور امریکی حکام کے درمیان ملاقات ہوئی ہے۔

غیر ملکی میڈیا کی رپورٹس کے مطابق چینی وزارت خارجہ نے کہا کہ ایک اعلیٰ سطحی امریکی وفد نے اتوار اور پیر کو چین کے نائب وزیر خارجہ کے ساتھ بیجنگ کے پڑوسی شہر لانگ فانگ میں بات چیت کی۔

امریکی محکمہ خارجہ نے کہا کہ اس دورے کا مقصد امریکی صدر جو بائیڈن کی چینی ہم منصب شی جن پنگ کے ساتھ ہونے والی حالیہ بات چیت کی پیروی کرنا اور اگلے سال کے اوائل میں وزیر خارجہ انٹونی بلنکن کے دورہ چین کی تیاری کرنا ہے۔

لانگ فانگ میں ہونے والی بات چیت میں مشرقی ایشیائی امور کے اسسٹنٹ سکریٹری برائے خارجہ ڈینیئل کرٹن برنک، وائٹ ہاؤس کی قومی سلامتی کونسل کی چین کے امور کی سینئر ڈائریکٹر لورا روزنبرگر اور نائب وزیر خارجہ ژی فینگ نے بین الاقوامی اور بین الاقوامی امور پر وسیع پیمانے پر تبادلہ خیال کیا۔

چینی وزارت خارجہ کے ترجمان وانگ وین بن کا کہنا تھا کہ بات چیت صاف اور تعمیری تھی جس میں مشترکہ تشویش کے علاقائی مسائل پر بات چیت ہوئی۔

امریکی محکمہ خارجہ کا کہنا تھا کہ دورے کا مقصد چینی اور امریکی صدرو کی حالیہ بات چیت کے تسلسل کو آگے بڑھانا ہے، اور دونوں ملکوں کے مابین مسابقت کو تنازعات میں نہ بدلنے پر اتفاق کیا گیا۔

چینی وزارت خارجہ کے ترجمان کا کہنا تھا کہ وزیر خارجہ 15 دسمبر کو نیورک میں ہی 77 اور چین کی وزارتی کانفرنس کی میزبانی اور صدارت کرینگے۔

 امریکی عہدیدار کا کہنا تھا کہ چین میں زیر حراست امریکی شہریوں کی رہائی پر بھی بات کی گئی۔

چینی حکام کا کہنا ہے کہ امید ہے کہ امریکی فریق اپنے الفاظ کو عمل سے جوڑ کر چینی پالیسی اور تین مشترکہ اعلامیوں کی پاسداری کرے گا۔