پاکستان تحریک انصاف کے رہنما شفقت محمود نے کہا ہے کہ جب تک ان کے کیسز ختم نہیں ہوتے یہ الیکشن کرانا نہیں چاہتے ہیں۔

تفصیلات کے مطابق پاکستان تحریک انصاف کے سینئر رہنما کے ہمراہ پریس کانفرنس کرتے ہوئے شفقت محمود نے کہا کہ دھمکیاں دیکر گناہوں پر پردہ نہیں ڈال سکتے ہیں اور جس کا دنیا میں ایک مقام ہے اس کے لیے گھٹیا زبان استعمال کرتے ہیں۔

انہوں نے بتایا کہ نوازشریف نے قانون بنایا کہ بیرون ملک سےآئےپیسوں کی پوچھ گچھ نہیں ہوگی، ان کا طریقہ واردات یہ ہے کہ یہ بے نامی اکاؤنٹ کھولتے ہیں  اور رشوت کے پیسے رمضان شوگر مل ملازمین کے اکاؤنٹ میں جمع ہوتے تھے،مقصود چپڑاسی،پاپڑوالوں کے نام پر پیسے منگوا کر کرپشن کی گئی۔

انہوں نے کہا کہ شہباز شریف نے 1990 میں اثاثے 20 لاکھ ڈکلیئر کیے تھے اور پھر وزیراعلیٰ بننے کے بعد اثاثےسوا 7 ارب ہوجاتے ہیں۔

اس موقع پر رہنما پی ٹی آئی مصدق عباسی نے کہا کہ ان کے کیسز کی تفتیش کرنے والےڈاکٹر رضوان کی موت ہوئی اور رمضان شوگر مل کیسز میں پنجاب کا30کروڑ خرچ کیا گیا ۔

ان کا کہنا تھا کہ جرم کبھی مرتا نہیں یہ خوش فہمی میں ہیں تاہم جو کیسز بغیر تفتیش کے ختم ہورہے ہیں وہ نیب ایف آئی اے میں موجود رہنے چاہئیں اور اسی مقصد کے تحت چیئرمین نیب کو خط لکھا ہے کہ پنجاب کے کیسزکو واپس بھیجیں کیونکہ شریف برادران کے خلاف 18 کیسز ہیں۔

بعدازاں حماد اظہر کا کہنا تھا کہ  ان کیخلاف تفتیش کرنے والے افسران پر اسرار طور پر مرجاتے ہیں جبکہ گواہان کوقتل اورلٹیروں کو ملک پر مسلط کیا جاتا ہے۔

انہوں نے کہا کہ آج اسکولوں کے بچوں کو بھی ان کی کرپشن کا پتا ہے اور الیکشن کا نام سن کر ان کی ٹانگیں کانپ جاتی ہیں،اگر صادق اور امین ہیں تو الیکشن کرائیں۔