پاکستان تحریک انصاف (پی ٹی آئی) کے چیئرمین عمران خان پر قاتلانہ حملے کے واقعے کی تحقیقات کے لیے بنائی گئی مشترکہ تحقیقاتی ٹیم (جے آئی ٹی) نے تین وفاقی وزراء کو طلب کر لیا ہے۔

ذرائع کے مطابق وزیر داخلہ رانا ثناء اللہ، وزیر اطلاعات مریم اورنگزیب اور جاوید لطیف کو جے آئی ٹی نے آج طلب کیا ہے۔

وفاقی وزراء کو 18 دسمبر کو صبح 11 بجے کیپٹل سٹی پولیس آفس لاہور میں پیش ہونے کو کہا گیا ہے۔

یہ بھی پڑھیں: عمران خان پر قاتلانہ حملے کی تحقیقات، جے آئی ٹی نے تفتیش کا دائرہ وسیع کردیا

اس سے قبل  جے آئی ٹی نے پاکستان تحریک انصاف (پی ٹی آئی) کی خاتون صوبائی وزیر سمیت 3 رہنماؤں کے بیان ریکارڈ کئے تھے جس میں  صوبائی وزیر ڈاکٹر یاسمین راشد، زبیر خان نیازی اور عمر فاروق کے نام شامل تھے۔

جے آئی ٹی کا فیصل واوڈا کو شامل تفتیش کرنے کا فیصلہ

اس سے قبل سابق وزیراعظم اور پاکستان تحریک انصاف کے چیئرمین عمران خان پر قاتلانہ حملے کی تفتیش میں اہم پیش رفت سامنے آئی تھی۔

عمران خان پر قاتلانہ حملے کے معاملے پر تشکیل دی جانے والی جے آئی ٹی نے فیصل واوڈا کو شامل تفتیش کرنے کا فیصلہ کیا تھا۔

یہ بھی پڑھیں: عمران خان پر حملے کی تحقیقات، پی ٹی آئی رہنماؤں کے بیانات ریکارڈ

پنجاب حکومت نے فیصل واوڈا کو شامل تفتیش کرتے ہوئے پیش ہونے کی ہدایت کی تھی جبکہ جے آئی ٹی نے بھی فیصل واوڈا کو ریکارڈ سمیت پیش ہونے کی ہدایت کی تھی۔

جوائنٹ انویسٹیگیشن ٹیم نے سانحہ وزیر آباد سے متعلق تفتیش میں فیصل واوڈا کو طلب کیا تھا کیونکہ انہوں نے آزادی مارچ میں خون خرابہ ہونے سے متعلق بیان دیا تھا تاہم فیصل واوڈا کو تمام دستاویزات، قومی شناختی کارڈ کے ساتھ پیش ہونے کی ہدایت کردی تھی۔

خیال رہے کہ چیئرمین عمران خان پر قاتلانہ حملے کی تحقیقات کے معاملے پر فیصل واوڈا اسپیشل مشترکہ تحقیقاتی ٹیم (جے آئی ٹی) کے سامنے پیش نہیں ہوئے تھے۔