وزیراعظم نے سرکاری عمارتوں کو شمسی توانائی پر منتقل کرنے کی ہدایت کردی ہے۔

تفصیلات کے مطابق وزیراعظم شہباز شریف کی زیر صدارت شمسی توانائی سے متعلق اجلاس منعقد ہوا جس دوران بریفنگ دیتے ہوئے بتایا گیا کہ نیپرا رواں ماہ کے اختتام تک شمسی توانائی کے بڑے پراجیکٹس کے ٹیرف کا تعین کر لےگی جس کے بعد متبادل توانائی بورڈ سرمایہ کاروں سے بڈز طلب کرے گا۔

بریفنگ میں بتایا کہ شمسی توانائی سے بجلی پیدا کرنے کے تین منصوبے زیر غور ہیں جس کے تحت لیہ میں 1200، مظفرگڑھ اور تریموں میں 600 میگاواٹ کے منصوبے لگائے جائیں گے۔

اسکے علاوہ وفاقی حکومت کے زیر انتظام عمارتوں کی سولرائزیشن کیلئے کنسلٹنٹس کی خدمات حاصل کر لی گئی ہیں۔

یہ بھی پڑھیں: پنجاب شمسی توانائی سے بجلی کی پیداوار میں تمام صوبوں سے آگے ہے، وزیر توانائی پنجاب

اس موقع پر وزیراعظم نے ہدایات جاری کرتے ہوئے کہا کہ موسم گرما کے آغاز سے قبل سرکاری عمارتوں کو شمسی توانائی پر منتقل کیا جائے، جس سے سرکاری اداروں کے بجلی کے بلوں میں خاطر خواہ کمی ہو گی۔

انہوں نے کہا کہ شمسی توانائی وقت کی اہم ضرورت ہے جبکہ معیشت کی بہتری اور امپورٹ بل میں کمی کے لیے شمسی توانائی کا فروغ نا گزیر ہے۔

اسکے علاوہ وزیراعظم نے نجی سطح پر شمسی توانائی کے استعمال کو فروغ دینے کے حوالے سے ضروری اقدامات کی ہدایت کرتے ہوئے کہا ہے کہ شمسی بجلی گھروں کے حوالے سے بڈنگ کا کام تیز کیا جائے۔

یہ بھی پڑھیں: گزشتہ برس شمسی توانائی کی پیداوار میں 23 فی صد کا اضافہ ہوا: رپورٹ