اسپیکر قومی اسمبلی راجہ پرویز اشرف کی جانب سے تحریک انصاف کے اجتماعی استعفے منظور کرنے سے انکار کے معاملے پر اسد قیصر نے عمران خان سے رابطہ کیا۔

تفصیلات کے مطابق رابطے کے دوران سابق اسپیکر  اسد قیصرنے پاکستان تحریک انصاف کے چیئرمین عمران خان کو اسپیکر قومی اسمبلی سے ملاقات کی تفصیلات سے آگاہ کیا۔

پی ٹی آئی رہنما اسد قیصر نے سابق وزیراعظم عمران خان سے گفتگو کرتے ہوئے کہا کہ موجودہ حکومت انتخابات سے بھاگ رہی ہے۔

سابق اسپیکر اسد قیصر نے مزید کہا کہ ہم اجتماعی استعفے دے چکے ہیں استعفیٰ کی تصدیق نہ کر کے غیر آہینی کام کیا جارہا ہے۔

اسپیکر کا اقدام جانبدارانہ ہے

اس سے قبل سابق اسپیکر اسد قیصر نے پارلیمنٹ ہاؤس کے باہر میڈیا سے گفتگو کرتے ہوئے کہا تھا کہ ہم سمجھتے ہیں اسپیکر قومی اسمبلی راجہ پرویز اشرف کا اقدام جانبدارانہ ہے۔

انہوں نے کہا کہ اسپیکر  کے سامنے اپنا مؤقف رکھا، اسپیکر سے پوچھا 11ایم این ایز کیا آپ کے پاس آئے تھے، اس کا اسپیکر کے پاس کوئی جواب نہیں تھا۔

یہ بھی پڑھیں؛ پی ٹی آئی کا اجتماعی استعفوں کی منظوری پر اصرار، اسپیکر کا انکار

اسد قیصر نے کہا کہ شاہ محمود کے ساتھ دیگر اراکین نے اعلانیہ کہا کہ استعفے دے رہے ہیں، جاوید ہاشمی نے بھی شاہ محمود کی طرح اسمبلی میں استعفوں کا اعلان کیا تھا، ہم اسمبلی قواعد کے مطابق استعفے دستخط کر چکے تھے۔

مطالبہ کرتے ہیں ملک میں فوری الیکشن کرائے جائیں

انہوں نے کہا کہ قاسم سوری جب اسپیکر تھے استعفوں کی منظوری کا پراسس مکمل کیا تھا، ہم نے بتایا قاسم سوری استعفے منظور کرچکے ہیں۔

سابق اسپیکر نے مزید کہا کہ مطالبہ کرتے ہیں ملک میں فوری الیکشن کرائے جائیں، سپریم کورٹ نے کہا تھا جو فلور پر کہتا ہے اسکی بات درست ہے۔

ملاقات کی اندرونی کہانی

اسپیکر قومی اسمبلی راجہ پرویز اشرف سے تحریک انصاف کے وفد کی ملاقات کی اندرونی کہانی سامنے آگئی ہے۔

ذرائع کے مطابق اسپیکر نے استعفے نہ دینے والے اراکین اور خفیہ رابطوں کی تفصیل سے آگاہ کیا۔

ذرائع کا کہنا تھا کہ ملاقات میں پی ٹی آئی کے ارکان نواز الہیٰ، طالب نکئی نے اسپیکر کو چھٹی کی درخواست دی جبکہ زبیدہ جلال، غلام بی بی بھروانہ اور غلام محمد لالی نے ایوان کے حاضری رجسٹر میں حاضری لگائی اور ان اراکین نے حاضری کی بنیاد پر تنخواہ کا بھی دعویٰ کردیا۔

یہ بھی پڑھیں: آئین اور قواعد کے مطابق استعفے منظور کریں گے، اسپیکر قومی اسمبلی

ذرائع نے بتایا کہ 22ارکان نے اسپیکر کو ٹیلی فون کیا اور کہا کہ وہ استعفی نہیں دینا چاہتے اور چھ ارکان نے کہا کہ  اجتماعی استعفوں پر ہمارے دستخط جعلی ہیں۔

اس موقع پر اسد قیصر نے کہا کہ ہم اس بارے میں چیئرمین پی ٹی آئی عمران خان سے بات کر کے آپ کو بتائیں گے۔