پاکستان کرکٹ بورڈ نے ایشیا کپ 2023 کسی نیوٹرل وینیو پر نہ کرانے کا فیصلہ کر لیا ہے۔

میڈیا رپورٹس کے مطابق پاکستان کرکٹ بورڈ نے ایشیا کپ 2023 کو پاکستان سے کسی نیوٹرل وینیو پر منتقل کرنے سے انکار کر دیا ہے اور اس حوالے سے ایشین کرکٹ کونسل کا جلد اجلاس بلانے کی درخواست دینے کا ارادہ کیا ہے۔

واضح رہے کہ ایشیا کپ 2023 کی میزبانی فی الحال پاکستان کے پاس ہے تاہم بھارت اس ٹورنامنٹ میں جانے کا خواہشمند نہیں ہے۔، بھارت نے کہا کہ ایونٹ کو کسی نیوٹرل وینیو پر منتقل کیا جائے۔

پی سی بی نے ایونٹ پاکستان میں کرانے کے اپنے موقف پر زور دیا ہے۔ کچھ ذرائع نے ایونٹ کو متحدہ عرب امارات منتقل کرنے کا مشورہ دیا ہے لیکن پاکستان کرکٹ بورڈ (پی سی بی) اس تجویز کے خلاف ہے۔

رمیز راجہ کے دور میں پی سی بی نے واضح موقف اختیار کرتے ہوئے کہا تھا کہ اگر بھارت ٹورنامنٹ میں شرکت نہیں کرتا ہے تو پاکستان بھارت میں شیڈول آئی سی سی ورلڈ کپ 2023 میں شرکت نہیں کرےگا۔

پاکستان کرکٹ بورڈ کی عبوری کمیٹی کے سربراہ نجم سیٹھی نے انٹرنیشنل لیگ ٹی ٹوئنٹی کی افتتاحی تقریب کے دوران ایشین کرکٹ کونسل کے ٹوستھ پریرا سے ملے تھے۔

پاکستان کرکٹ بورڈ کا موقف ہے ایشیا کپ 2023 پاکستان میں ہونا چاہیئے اگر بھارت اس ایونٹ میں شریک نہیں ہوتا تو پاکستان ورلڈ کپ کا بائیکاٹ کرے گا۔

پاکستان کرکٹ بورڈ کے اس واضح موقف کے بعد بھارت میں ہونے والے ورلڈ کپ کے ساتھ ساتھ چمپئینز ٹرافی کو بھی نقصان پہنچ سکتا ہے۔