سمندر پار پاکستانیوں کے ووٹ کے معاملے میں سپریم کورٹ نے عمران خان اور شیخ رشید کی درخواستوں پر الیکشن کمیشن کو نوٹس جاری کردیے۔

تفصیلات کے مطابق سپریم کورٹ میں سمندر پارپاکستانیوں کو ووٹ کا حق دینے کے کیس کی سماعت ہوئی۔

عدالتِ عظمٰی نے سابق وزیراعظم عمران خان اور سابق وزیرداخلہ شیخ رشید کی درخواستوں پر الیکشن کمیشن کو نوٹس کے ساتھ ساتھ معاونت کیلئے اٹارنی جنرل اور نادرا کو بھی نوٹس جاری کردیا۔

جسٹس اعجاز الاحسن نے وکیل داؤود غزنوی کی الیکشن ایکٹ ترمیم کیخلاف اپیل پر بھی نوٹس جاری کیا اور ریمارکس دیے کہ ووٹ کا حق ختم نہیں کیا گیا مسئلہ صرف طریقہ کار کا ہے، اوورسیز کو ووٹ ڈالنے پاکستان آنا ہوگا یا باہر رہ کر بھی ووٹ ڈال سکتے ہیں۔

جسٹس اعجاز الاحسن نے کہا کہ بظاہر ووٹنگ کا طریقہ کار اتنا مشکل بنا دیا گیا ہے کہ اوورسیز ووٹ ڈال ہی نہ سکیں۔

وکیل درخواست گزار نے کہا کہ سپریم کورٹ نے اپنے فیصلے میں سمندر پار پاکستانیوں کو ووٹ کا حق دیا تھا۔ الیکشن ایکٹ میں ترمیم عدالتی فیصلے کی روح کیخلاف ہے۔

عارف چوہدری ایڈووکیٹ نے مؤقف اپنایا کہ سپریم کورٹ کے حکم پر نادرا نے سسٹم بنایا اور ضمنی انتخابات میں تجربہ ہوا تھا۔ ضمنی انتخابات میں تجربے پر کوئی اعتراض سامنے نہیں آیا تھا،ترمیم کرکے دوبارہ پائلٹ پراجیکٹ کرنے کا کہا گیا تاکہ قانون سازی ہوسکے۔

عدالت نے مزید سماعت دو ہفتے کیلئے ملتوی کرتے ہوئے کہا کہ نادرا اور الیکشن کمیشن معاونت کریں کہ بنایا گیا سسٹم معیار کے مطابق ہے یا نہیں۔