چیئرمین پی ٹی آئی عمران خان اور سابق وزیراعلیٰ پنجاب پرویزالٰہی کی جانب سے حکومت کے منفی ہتھکنڈوں کا ڈٹ کر مقابلہ کرنے کے عزم کا اظہار کیا گیا ہے۔

تفصیلات کے مطابق سابق وزیراعلظم عمران خان سے سابق وزیراعلیٰ پنجاب چوہدری پرویز الٰہی کی ملاقات ہوئی ہے جس میں سیاسی صورتحال ، ملکی معاملات اور حکومت کے انتقامی اقدامات پر گفتگو کی گئی ہے۔

دوران ملاقات عمران خان اور پرویز الٰہی نے پنجاب اور خیبر پختونخواہ کے انتخاب کے حوالے سے بھی بات چیت کی۔

اس موقع پر عمران خان نے کہا کہ حکومت الیکشن سے نہیں بھاگ سکتی، ان کو انتخاب کی تاریخ دینا پڑے گی ورنہ آئینی شکنی کی مرتکب ہوگی۔

یہ بھی پڑھیں: اے پی سی میں شرکت کیلئے پی ٹی آئی کی مشاورت جاری، حتمی فیصلہ عمران خان کرینگے

انہوں نے کہا کہ حکومت کی ناک تلے دوبارہ دہشت گردی ملک میں سر اٹھا رہی ہے لیکن حکومت کو امن و امان کی نہیں مخالفیں کو کچلنے کی فکر ہے۔

دوسری جانب پرویز الٰہی کا کہنا تھا کہ حکومت ملکی معیشت کو تباہ کرچکی اور اب امن و امان کی صورتحال بھی تیزی سے خراب ہو رہی ہے۔

انہوں نے کہا کہ پارلیمانی لاجز میں سابق ارکان پارلیمنٹ کے کمروں کے تالے توڑ ے جارہے ہیں اور گرفتاریاں، مقدمات، چھاپوں کے سائے میں اے پی سی کی دعوت دے رہی ہے  ۔

انہوں نے مزید کہا کہ شہباز شریف کی شوباز یاں بری طرح ایکسپوز ہورہی ہیں، ان کے پاس عوامی ریلیف کے لئے کچھ نہیں ہے، صرف اورصرف عمران خان ،تحریک انصاف اوراتحادیوں کو کچلنے کا ایجنڈا سرگرم ہے۔

سابق وزیراعلیٰ کا کہنا تھا کہ پی ڈی ایم کی حکومت نااہلی کے بعدانتقامی کارروائیوں میں بھی ورلڈ ریکارڈ بناناچاہتی ہے لیکن حکمرانوں کے مقدمات سے کوئی خوفزادہ نہیں ہے اور ان کے انتقام کے ہر ہتھکنڈے کا ڈٹ کرمقابلہ کریں گے ۔

ان کا کہنا تھا کہ عمران خان کی مقبولیت سے خوفزدہ پی ڈی ایم الیکشن کی تاریخ دینے کو تیار نہیں ہے، یہ بدترین بوکھلاہٹ کاشکار ہیں۔

خیال رہے کہ ملاقات میں سابق وزیر دفاع پرویز خٹک بھی شریک رہے۔