کراچی: پاکستان سپر لیگ (پی ایس ایل) سیزن 8 کی تیاریاں آخری مراحل میں داخل ہوگئی ہیں۔

تفصیلات کے مطابق پاکستان سپر لیگ (پی ایس ایل) کا آغاز 13 فروری سے ملتان میں ہوگا جس کی افتتاحی تقریب بھی منعقد ہوگی۔

نیشنل اسٹیڈیم میں کھیلے جانے والے 9 میچز کے لیے کیوریٹرز کی تیاری مکمل کرلی گئی ہے جب کہ میچز کے لیے چار پریکٹس پچز بھی تیار کی گئی ہیں۔

نیشنل اسٹیڈیم میں کل سے پریکٹس کا باقاعدہ آغاز ہوجائے گا جب کہ پریکٹس کا سلسلہ اگلے 5 روز تک جاری رہے گا۔

کل اسلام آباد یونائیٹڈ اور کوئٹہ گلیڈی ایٹرز کی ٹیمیں پریکٹس کریں گی جب کہ نیشنل اسٹیڈیم میں 14 فروری کو پی ایس ایل 8 کا دوسرا میچ شیڈول ہے جس میں کراچی کنگز کا مقابلہ پشاور زلمی سے ہوگا۔

واضح رہے کہ 13 فروری سے 26 فروری کے دوران پی ایس ایل 8 کے میچز کراچی اور ملتان میں کھیلے جائیں گے جب کہ بقیہ میچز لاہور اور راولپنڈی میں شیڈول ہیں۔

ٹورنامنٹ کا کوالیفائر میچ، ایلیمنیٹر 1 اور ایلیمنیٹر 2 سمیت فائنل میچ لاہور کے قذافی اسٹیڈیم میں کھیلا جائے گا جس کے بعد رنگا رنگ اختتامی تقریب بھی منعقد ہوگی۔

دوسری جانب پی ایس ایل 8 کے لیے نئی ٹرافی متعارف کرانے کا فیصلہ کیا گیا ہے جس کی رونمائی کل لاہور کے تاریخی شالیمار باغ میں ہوگی۔

پی سی بی کی مینجمنٹ کمیٹی کے چیئرمین نجم سیٹھی ٹرافی کی رونمائی کریں گے جب کہ تقریب میں پی ایس ایل فرنچائزز کے کپتان بھی شریک ہوں گے۔

علاوہ ازیں مینجمنٹ کمیٹی کے اراکین اور فرنچائزز کے نمائندے بھی تقریب میں شامل ہوں گے۔