چین کے بعد ایران میں  بھی کورونا وائرس شدت اختیار کرتا جا رہا ہے جس کے باعث  ہزاروں  زائرین پاک ایران بارڈر پر پھنس گئے۔

ذرائع وزارت مذہبی امور  کے ترجمان کے مطابق ہزاروں زائرین کی پاکستان واپسی  اور کورونا وائرس کی روک تھام کے حوالے سے  وزیر مذہبی امور نور الحق قادری کی زیر صدارت اہم اجلاس منعقد ہوا ۔

اجلاس میں وزیراعظم کے معاون خصوصی صحت ڈاکٹر ظفر الطاف، سیکرٹری مذہبی امور میاں محمد مشتاق بورانہ، جید شیعہ علماء،  وفاق المدارس کے نمائندگان، ایران عراق زیارات کے منتظمین اور قافلہ سالاروں نے شرکت کی۔

اجلاس میں ایران میں کورونا وائرس کی اطلاعات کے باعث پاکستانی زائرین کو وبا ءسے بچاؤ، احتیاطی اقدامات، اور سفری ہدایات سے متعلق تفصیلی غور و خوض کیا گیا۔

ذرائع وزارت مذہبی امور کے مطابق اجلاس  میں فیصلہ کیا گیا کہ جید علماء کرام اور قافلہ سالار زائرین کو حکومتی عملے سے مکمل تعاون کے  لیےقائل کریں۔

کورونا وائرس کو روکنے کے امکانات کم ہورہے ہیں، عالمی ادارہ صحت

وزارت مذہبی امور نے اجلاس کے شرکاء  کو بریفنگ  میں کہا کہ پاکستان کو اس بیماری سے محفوظ رکھنے کے لئے تمام شعبہ ہائے زندگی اپنا اپنا کردار ادا کریں۔

اجلاس کے بعد میڈیا سے گفتگو کرتے ہوئے وزیر مذہبی امور نور الحق قادری نے کہا کہ کورونا وائرس خطرناک وبا ءکی صورت میں پھیل رہی ہے۔

نور الحق قادری کا کہنا تھا کہ کورونا وائرس کی روک تھام کے لیے علما کے ساتھ مشاورت کی گئی ہے۔ذاتی مفادات کی بجائے قومی مفادات کو مدنظر رکھا جائے گا۔

انہوں نے کہا کہ اس  حوالے سے اپنے ایران جانے والے زائرین کو آگاہی کا پیغام دینا چاہتے ہیں،زائرین ہوں یا تاجر، ایران کے سفر حتی الامکان گریز کیا جائے۔

وزیر مذہبی امور نے کہا کہ مدارس، خطبہ جمعہ اور مجالس میں عوام کو آگاہی دی جائے۔لوگوں کو احتیاطی تدابیر سے آگاہ بھی کیا جا رہا ہے۔

نور الحق قادری نے کہا کہ اس مشکل وقت میں ہمسایہ ممالک ایران اور چین کے ساتھ کھڑے ہیں۔ایرانی حکام کے ساتھ 3 دن سے پالیسی بنا رہے ہیں۔