تحریک لبیک پاکستان (ٹی ایل پی) کی جانب سے مہنگائی کے خلاف ہڑتال کی کال پر مختلف شہروں میں کہیں مکمل تو کہیں جزوی طور پر کاروبار بند کردیے گئے ہیں۔

تفصیلات کے مطابق مہنگائی کے خلاف شٹر ڈاؤن ہڑتال کی کال پر کراچی کے علاقے بلدیہ ٹاؤن، اتحاد ٹاؤن اورنگی ایک بلاک اور اطراف کے علاقوں میں دکانیں اور کاروبار بند کردیے گئے ہیں۔

مشتعل افراد نے ٹائر جلا کر اور رکاوٹیں کھڑی کر کے روڈ بند کردیا جس کی وجہ سے  سڑکوں پر ٹریفک معمول سے کم ہے۔

ٹی ایل پی کارکنان کی جانب سے شٹر ڈاؤن کے ساتھ پہیہ جام بھی کردیا گیا اور  ہڑتال کا دائرہ تعلیمی اداروں کی بندش تک پھیلادیا گیا ہے۔ ملیر، شاہ فیصل کالونی، کورنگی، لانڈھی میں ٹی ایل پی کارکنان نے زبردستی نجی اسکولز بند کردیے۔

پبلک ٹرانسپورٹ سے نجی دفاتر جانے والے افراد ہڑتال کی وجہ سے پریشان ہوگئے ہیں، سڑکوں پر  پرائیویٹ ٹرانسپورٹ سے دفاتر جانے والوں کو روکنے کی کوشش کی جارہی ہے۔

زبردستی اسکولز بند کرانے، گاڑیوں کو روکنے اور دکانیں بند کرانے والوں کے خلاف رینجرز حرکت میں آگئی ہے مختلف علاقوں میں رینجرز کا گشت جاری ہے۔

علاوہ ازیں تحریک لبیک کی کال پر جیکب آباد، تھر پارکر، سانگھڑ، کندھ کوٹ، ٹنڈوالہ یار، کشمور، سجاول، شکارپور،  ٹھٹھہ، حیدرآباد اور گھوٹکی میں بھی مکمل شٹر ڈاؤن ہڑتال جاری ہے۔

اس موقع پر ٹی ایل پی کارکنان نے کہا کہ وفاقی حکومت نے عوام پر مھنگائی کا بم گرا دیا ہے، آٹا، گھی، چینی، دالیں، مرغی سمیت تمام کھانے پینے کی اشیاء مہنگی کر دی گئی ہیں۔

ٹی ایل پی کارکنان کا کہنا ہے کہ دیہاڑی دار طبقہ دو وقت کی روٹی کے لیے بھی پریشان ہے، فاقی حکومت مہنگائی کو کنٹرول کرنے کے بجائے آئے روز ریٹ بڑھا رہی ہے۔

کارکنان نے مزید کہا کہ عوام پر جو مہنگائی کا بم گرایا گیا ہے وہ کسی صورت میں قبول نہیں ہے، عوام مہنگائی کی چکی میں پس رہی ہے حکمرانوں کو کوئی پرواہ نہیں۔

واضح رہے کہ تحریک لبیک پاکستان (ٹی ایل پی) نے ملک میں بڑھتی مہنگائی اور پیٹرولیم مصنوعات کی قیمتوں میں اضافے کے خلاف پیر 27 فروری کو ملک بھر میں شٹر ڈاؤن ہڑتال کا اعلان کیا تھا۔

دوسری جانب تاجر تنظیموں نے تحریک لبیک پاکستان کی 27 فروری کی ہڑتال سے لاتعلقی کا اعلان کرتے ہوئے مارکیٹیں کھولنے اور کاروبار جاری رکھنے کے عزم کا اظہار کردیا تھا۔