سابق وفاقی وزیر فواد چوہدری نے کہا ہے کہ آئین کا تحفظ ہر پاکستانی کا فرض ہے اور آئین کی بالادستی کے لیے آخری حد تک جائیں گے۔

تفصیلات کے مطابق سپریم کورٹ کے باہر میڈیا سے گفتگو کرتے ہوئے رہنما پی ٹی آئی کا کہنا تھا کہ عمران خان آج 4 مقدمات میں عدالتوں میں پیش ہونگے۔

انہوں نے کہا یہ جو حاضریاں ہیں یہ عمران خان کے لئے ازخود ایک بہت بڑا سیکیورٹی ٹھریٹ ہے جبکہ پہلے ان پر ایک قاتلانہ حملہ ہوچکا ہے اور اب عدالت میں پیشی سے نا صرف عمران خان بلکہ ان کے ساتھ آنے والے ہزاروں لوگوں کی سیکیورٹی کو خطرہ ہے۔

انہوں نے مزید کہا کہ یہ معاملات باآسانی ویڈیو لنک پر ہوسکتے تھے لیکن مجھے نہیں سمجھ آرہی کہ کیوں عمران خان کو ایکسپوز کرنے کی کوشش کی جارہی ہے کہ ان پر ایک اور حملہ ہو۔

یہ بھی پڑھیں: سپریم کورٹ میں پاکستان کے آئین کا مقدمہ چل رہا ہے، فواد چوہدری

فواد چوہدری نے کہا کہ عمران خان کی عدالت میں حاضری پر تحریک انصاف کو شدید تشویش ہے کیونکہ ان کو ایسے مقامات پر بلایا جارہا ہے جہاں ان پر حملے ہوسکتے ہیں اور اس کی مذمت بھی کرتے ہیں۔

ان کا کہنا تھا کہ مریم نواز نے کل بھی دھمکیاں لگائی ہیں اور کہا ہے کہ اقتدار کا فیصلہ نواز شریف کریں گے جبکہ الیکشن کا فیصلہ وہ خود کریں گی تو آئین اور ادارے کیا کریں گے ، اس صورتحال میں ان کی کیا مذمہ داری رہ جاتی ہے؟

انہوں نے بتایا کہ اگر مریم نواز کی بات مان لی جاتی ہے تو پھر آئیں کے کاغذ پھاڑ کر اس پر پکوڑے ہی کھائے جاسکتے ہیں۔

انہوں  نے کہا کہ ان کی اپنی پارٹی ایک بہت بڑی توڑ پھوڑ کا شکار ہے لہٰذا مریم نواز اداروں کو دھمکیاں دینے سے باز رہیں۔

انہوں نے مزید کہا کہ آئیں ہی پاکستان میں سپریم ہوگا کیونکہ آئین کے سپریم ہونے کا مطلب یہ ہے کہ پاکستان کے عوام سپریم ہیں اور اگر آئین کی بالادستی نہیں ہے تو پاکستان کے عوام کی بالادستی نہیں ہے، اس لئے پاکستان کے عوام آئین کی بالادستی کے لئے آخری حد تک جائیں گے اور ہم بھی کوشش کریں گے کہ آئیں کی بالادستی ہمیشہ قائم رہے۔

رہنما پی ٹی آئی نے بتایا کہ آئین کی بالادستی کے  مقصد کے تحت آج ہمارے 400 سے زائد اراکین مختلف جیلوں میں قید ہیں، انہوں نے اپنی گرفتاریاں ازخود دی ہیں جبکہ کسی اور جماعت نے اتنی بڑی تعداد میں گرفتاریاں نہیں دی ہیں۔