پاکستان تحریک انصاف (پی ٹی آئی) کے چیئرمین عمران خان نے کہا ہے کہ لاہور میں تمام جماعتیں سیاسی سرگرمیاں کر رہی ہیں لیکن نگران حکومت نے صرف ہماری ریلی پر پابندی لگائی ہے۔

سابق وزیر اعظم عمران خان نے غیر ملکی نشریاتی ادارے کو انٹرویو دیتے ہوئے کہا کہ جس طرح پنجاب کی نگران حکومت نے ہماری جماعت کی انتخابی ریلی پر پابندی عائد کی، ہمیں 80 کے قریب مقدمات میں الجھایا اس سے ظاہر ہوتا ہے کہ ہماری جماعت کو انتخابی مہم چلانے کی اجازت نہیں ہے۔

آئندہ الیکشن پی ٹی آئی انتخابی مہم کے بغیر لڑے گی؟

عمران خان نے کہا کہ لاہور میں تمام جماعتیں سیاسی سرگرمیاں کر رہی ہیں لیکن نگران حکومت نے صرف ہماری ریلی پر پابندی لگائی ہے، میں پوچھتا ہوں کہ ہمیں الیکشن مہم چلانے کی اجازت ہے یا نہیں کیونکہ ایک طرف میرے خلاف 80 مقدمات قائم کیے گئے ہیں اور میرے جماعت کے لوگوں پر بھی مقدمات بنائے جا رہے ہیں۔

سابق وزیر اعظم نے الزام عائد کیا کہ اب جب ہم اپنی انتخابی مہم لانچ کرنا چاہ رہے ہیں تو وہ بھی نہیں کرنے دے رہے، آئندہ الیکشن پی ٹی آئی انتخابی مہم کے بغیر لڑے گی؟

انتخابی جلسوں کے حوالے سے اپنا لائحہ عمل جلد ہی دیں گے

عمران خان نے پنجاب کی نگران حکومت کی جانب سے 8 اور 12 مارچ کو پی ٹی آئی کی ریلی پر پابندی عائد کرنے پر بات کرتے ہوئے کہا کہ اب ہم پیر کو لاہور ہائی کورٹ سے ریلی کی اجازت لے رہے ہیں۔ وہ فیصلہ کریں کہ کیا یہ الیکشن انتخابی مہم کے بغیر لڑا جائے گا۔

ان کا کہنا تھا کہ اب صوبائی اسمبلی کے انتخابات میں کم وقت رہ گیا ہے اور اس سلسلے میں وہ انتخابی جلسوں کے حوالے سے اپنا پورا لائحہ عمل جلد ہی دیں گے۔

میری جان کو خطرہ ہے

اپنے خلاف مقدمات میں عدالت میں پیش ہونے کے سوال کے جواب میں عمران خان نے حکومت پر الزام عائد کرتے ہوئے کہا کہ مجھے اپنے خلاف مقدمات میں عدالت میں پیش ہونے میں کوئی مسئلہ نہیں ہے مگر میری جان کو خطرہ ہے اس لیے عدالت سے تحفظ مانگ رہے ہیں اور اگر وہ یہ سیکیورٹی نہیں دی سکتی تو ویڈیو کانفرنس کے ذریعے پیش ہونے کی اجازت دے۔

چیئرمین پی ٹی آئی نے مزید کہا کہ میرے وکلا پیر کے روز اسلام آباد میں ہونے والی توشہ خانہ کی عدالتی سماعت میں پیش ہوں گے، وزارتِ داخلہ نے بڑے واضح طور پر کہا ہے کہ میری جان کو خطرہ ہے، میں عدالت سے یہی کہہ رہا ہوں کہ اگر جان خطرے میں ہے تو سیکیورٹی دیں۔