پاکستان تحریک انصاف کے مرکزی صدر چوہدری پرویز الہیٰ نے کہا ہے کہ توشہ خانہ کا ریکارڈ کھل گیا تو شریف فیملی کے چاروں طبق روشن ہوجائیں گے ۔ 

تفصیلات کے مطابق سابق وزیر اعلیٰ پنجاب چوہدری پرویز الہیٰ سے سیاسی شخصیات کی ملاقات ہوئی ہے ۔

ملاقات میں چوہدری پرویز الہیٰ نے گفتگو کرتے ہوئے کہا کہ تحریک انصاف کی کامیاب ریلی کے بعد ن لیگ کے پاؤں اکھڑ چکے ہیں، ریلی میں کارکنان کا جوش و جذبہ اور تاریخی استقبال قابلِ دید تھا ۔

ن لیگ کی ہر کارستانی الٹی پڑھ رہی ہے

انہوں نے کہا کہ مسلم لیگ ن کی ہر کارستانی اللہ کے فضل سے الٹی پڑھ رہی ہے توشہ خانہ اس کی سب سے بڑی مثال ہے ۔

چوہدری پرویز الہیٰ نے کہا کہ لاہور ہائی کورٹ نے 1990 سے 2001 تک توشہ خانہ کا ریکارڈ طلب کر لیا ہے ، 90  سے 2001 تک کا توشہ خانہ کا ریکارڈ کھل گیا تو ان کو سمجھ آ جائے گی ، شریف فیملی کے چاروں طبق روشن ہو جائیں گے ۔

یہ بھی پڑھیں: توشہ خانہ کی تفصیلات پبلک کرنے کے حوالے سے حکومت کا یوٹرن

انکا کہنا ہے کہ شریف فیملی نے 90 سے 2001 تک توشہ خانہ کو ذاتی خزانہ بنائے رکھا، نواز شریف کے اور بھی راز کھل سکتے ہیں کیا کیا لیا اور کس کس کو دیا ۔

پی ٹی آئی کے مرکزی صدر نے مزید کہا کہ انشاء اللہ مینار پاکستان میں اتوار کا جلسہ ملک کی تاریخ کا بڑا جلسہ ہو گا، مسلم لیگ ن کے تابوت میں یہ جلسہ آخری کیل ثابت ہو گا ۔

واضح رہے کہ ملاقات کرنے والوں میں اوورسیز پاکستانی اقبال اولکھ، واسع خان، شیخ عمر، کنول نسیم و یگر بھی موجود تھے ۔