پاکستان میں مقیم غیر قانونی افغان مہاجرین و دیگر غیر ملکیوں کو انخلاء کیلئے دی گئی مہلت ‏31 اکتوبر قریب آتی جا رہی ہے، اس میں صرف 12 دن باقی رہ گئے، جس کے باعث افغان مہاجرین کی وطن واپسی میں تیزی آگئی ہے۔

تفصیلات کے مطابق معیشت کی بحالی کے پیش نظر حکومت پاکستان نے غیر قانونی افغان باشندوں کو 1 اکتوبر 2023 کو ملک چھوڑنے کا تحریری حکم جاری کیا اور غیر قانونی افغان باشندوں کو انخلاء کے لیے 31 اکتوبر کی ڈیڈ لائن دی، اس فیصلے کے بعد روزانہ کی بنیاد پر پاکستان میں مقیم غیر قانونی افغان باشندے بذریعہ طورخم بارڈر اور چمن بارڈر افغانستان روانہ ہورہے ہیں۔

افغان شہریوں کی رضاکارانہ طور پر واپسی کا فیصلہ خوش آئند ہے، تاہم 18 اکتوبر کو 3076 افغان باشندے اپنے ملک چلے گئے، جن میں 601 مرد، 494 خواتین اور 1981 بچے شامل تھے۔

افغانستان روانگی کے لیے 38 گاڑیوں میں 150 خاندانوں کی اپنے وطن واپسی عمل میں لائی گئی، اب تک کل 48,508 افغان پناہ گزینوں کی اپنے وطن واپسی ہوچکی ہے، تاہم افغان باشندوں کی اپنے وطن واپسی خطے پر مثبت اثرات مرتب کرے گی۔

یاد رہے کہ قومی مفادات کے تحفظ کیلئے پاکستان واحد ملک نہیں جس نے غیر قانونی افغان شہریوں کو ملک بدر کرنے کا فیصلہ کیا، بہت سے ممالک جن میں بڑے ممالک بھی شامل ہیں  مفادات کے تحفظ اور ملکی ترقی کیلئے مختلف مواقعوں پر یہ فیصلے کرچکے ہیں ۔

انٹرنیشنل آگنائزیشن فار مائیگریشن (آئی او ایم) کی رپورٹ کے مطابق ایران نے 2021ء میں 10لاکھ 31 ہزار 757 افغان شہریوں کو ملک بدر کیا ۔

یورپی یونین ایجنسی آف اسائلم اورانٹرنیشنل فیڈریشن آف جرنلسٹس کی رپورٹ کے مطابق 1.7 ملین افغان شہری بغیر کسی ثبوت، بغیر کسی رجسٹریشن کے غیر قانونی طور پر پاکستان میں رہائش پذیر ہیں، یہ 1.7 ملین غیر قانونی تارکین وطن کا مخصوص گروہ ہے، جو پاکستان میں دہشت گردی اور مالی جرائم کے حوالے سے سب سے بڑا خطرہ ہے ۔

واضح رہے کہ غیر قانونی تارکین وطن کو دی گئی مہلت میں صرف 12 روز باقی رہ گئے ہیں، تاہم غیر قانونی طور پر مقیم غیرملکیوں کو 31 اکتوبر تک پاکستان چھوڑنا ہوگا، بصورت دیگر قانون نافذ کرنے والے ادارے گرفتاری اور ملک بدری کو یقینی بنائیں گے ۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں