وزیر اعظم کے معاون خصوصی برائے صحت ڈاکٹر ظفر مرزا نے کہا ہے کہ عوام پریشان اور گھبرانے کی بجائے وائرس سے بچاﺅ کیلئے احتیاطی تدابیر اختیار کریں۔

تفصیلات کے مطابق وزیر اعظم کے معاون خصوصی برائے صحت ڈاکٹر ظفر مرزا نے اپنے ایک بیان میں  کہا کہ وفاقی حکومت نے وائرس کے خلاف آگاہی مہم تیز کرتے ہوئے مختلف خصوصی پروگراموں کا آغاز کیا ہے۔

ڈاکٹر ظفر مرزا نے کہا کہ کثرت کے ساتھ ہاتھ دھوئیں کیونکہ یہی کورونا وائرس سے بچاﺅ کا بہترین راستہ ہے، اس کے ساتھ ساتھ عوام صحت سے متعلقہ اداروں کی ہدایات پر عمل کریں۔

وزیر اعظم کے معاون خصوصی برائے صحت ڈاکٹر ظفر مرزا نے مزید کہا کہ حکومت نے کورونا وائرس کے پھیلاﺅ کو روکنے کیلئے سخت حفاظتی اقدامات اٹھائے ہیں اور ملک کے تمام بارڈرز کو بند کر دیا گیا ہے۔

دوسری جانب  وزیراعلیٰ سندھ سید مراد علی شاہ کی صدارت میں کورونا  وائرس کے ٹاسک فورس کا اجلاس ہوا ۔

پاکستان میں کورونا کے 25 سے 30 مشتبہ کیسز ہیں، ڈاکٹر ظفر مرزا

اجلاس میں ترجمان وزیراعلیٰ سندھ کا کہنا تھا کہ کراچی میں کرونا وائرس کے مزید 4 کیسز  اورسکھر سے 13 مریضوں  کی تصدیق ہوئی ہے جس کے بعد صوبے میں مریضوں کی تعداد 34 جب کہ ملک بھر میں متاثرہ افراد کی تعداد 50 کے قریب  پہنچ گئی ۔

وزیراعلیٰ سندھ سید مراد علی شاہ نے  کراچی  او  ر سکھر میں کورونا وائرس کے مزید 18 کیسز کی تصدیق کردی  ہے۔

اجلاس  میں صوبے میں  تمام پارکس، تفریحی مقامات اور چڑیا گھر کو بند کرنے کا بھی فیصلہ کیا گیا ہے جب کہ 4 یا اس سے زائد افراد کے اکٹھے ہونے پر بھی پابندی ہو گی تاہم گھروں کی چار دیواری میں شادی بیاہ کی تقریبا کی اجازت ہوگی۔

یاد رہے کہ حکومت نے ملک میں کوروناوائرس کے پھیلائوکوموثرطریقے سے روکنے کے لئے اعلیٰ سطح کی ایک قومی رابطہ کمیٹی تشکیل دی ہے۔

یہ فیصلہ وزیراعظم عمران خان کی زیرصدارت اسلام آباد میں قومی سلامتی کمیٹی کے اجلاس میں کیا گیا جس میں ملک میں کورونا وائرس کے تناظر میں پیدا ہونے والی صورتحال کا تفصیلی جائزہ لیا گیا۔