وزیراعظم عمران خان  نے  پاکستان سمیت غریب ممالک کے قرضے معاف کرنے کا مطالبہ کردیا ہے ۔

وزیراعظم عمران خان نے  بین الاقوامی نیوزایجنسی اے پی کوانٹرویو دیتے ہوئے کہا کہ امیر ممالک غریب ممالک کے قرض معاف کرنے کیلئے تیار رہیں ،قرضے معاف ہونے سے کورونا وائرس سے نمٹنے میں مدد ملے گی۔

اپنے بیان میں وزیراعظم نے  کہا کہ پاکستان میں کورونا  وائرس زیادہ پھیلا تو اس سے نمٹنے کی صلاحیت اور وسائل نہیں ہیں، عالمی برادری غریب ممالک کے قرضے معاف کرنے پر غور کرے ۔

 عمران خان نے   ایران سےبھی  پابندیاں اٹھانے کا مطالبہ کرتے ہوئے کہا کہ پابندیاں اٹھانے سے ایران کو کورونا وائرس سے نمٹنے میں مدد ملے گی۔

وزیراعظم آج قوم سے خطاب کریں گے

بھارت کے بارے میں بات کرتے ہوئے وزیراعظم نے کہا کہ دنیا کے لیے ڈراؤنا خواب سچ ثابت ہوگیا، ایک ارب سے زیادہ آبادی اور ایٹمی پاور کا حامل ملک ایک شدت پسند سوچ والی جماعت کے قبضےمیں آچکا ہے۔

دوسری جانب وزیرِ اعظم عمران خان نے سماجی رابطے کی ویب سائٹ ٹوئٹر پر اپنے پیغام میں تحریکِ انصاف کے ایک کارکن محمد حسن کی وفات پر تعزیت کا اظہار کرتے ہوئے کہا ہے کہ محمد حسن کے انتقال  کا پتہ چلنے پر افسردہ ہوگیا ہوں۔

مہمند میں اجتماع کے دوران بری طرح زخمی ہونے والے ہمارے کارکن محمد حسن کی رحلت کا جان کر افسردہ ہوں۔ میری دعائیں اور تمام تر ہمدردیاں اہل خانہ کے ساتھ ہیں۔ تحریک انصاف انکی بہبود کااہتمام یقینی بنائے گی۔

— Imran Khan (@ImranKhanPTI) March 17, 2020

اپنے پیغام میں عمران خان  نے کہا کہ میں پشاور کے علاقے مہمند میں اجتماع کے دوران بری طرح زخمی ہونے والے ہمارے کارکن محمد حسن کی رحلت پر افسردہ ہوں اور میری تمام دعائیں مرحوم پی ٹی آئی کارکن کے لیے ہیں۔

وزیرِ اعظم عمران خان نے مزید کہا کہ میری تمام تر ہمدردیاں محمد حسن کے اہلِ خانہ کے ساتھ ہیں ۔ تحریکِ انصاف ان کی فلاح و بہبود کیلئے اہتمام یقینی بنائے گی۔