صوبے سے پولیو کے خاتمے کے لیے نگران وزیر اعلیٰ خیبر پختونخوا نے علماء کرام سے اپنا بھرپور کردار ادا کرنے کی اپیل کی ہے۔
تفصیلات کے مطابق نگران وزیر اعلیٰ خیبر پختونخوا جسٹس(ر) سید ارشد حسین شاہ سے متحدہ علماء بورڈ کے چیئرمین مفتی یوسف شاہ کی سربراہی میں وفد کی ملاقات ہوئی۔
ملاقات میں علماء کو درپیش مسائل، مدارس و مساجد کی تعمیر نو اور سولرائزیشن سے متعلق منصوبوں پر تبادلہ خیال کیا گیا جبکہ ملاقات میں مذہبی و مسلکی ہم آہنگی کو فروغ دینے اور معاشرتی برائیوں کے خاتمے کے لیے مشترکہ کردار ادا کرنے بارے میں بھی گفتگو کی گئی۔
ملاقات میں وفد نے ارشد حسین شاہ کو نگران وزرات اعلیٰ کی ذمہ داریاں سنبھالنے کی مبارکباد دی اور نیک خواہشات کا اظہار کیا۔
وفد نے گفتگو کرتے ہوئے کہا کہ ملک و صوبے کے استحکام اور ترقی کے لیے متحدہ علماء بورڈ اپنا بھرپور تعاون فراہم کرے گا۔
صوبے سے پولیو کے خاتمے کے لیے نگران وزیر اعلیٰ خیبر پختونخوا نے علماء کرام سے اپنا بھرپور کردار ادا کرنے کی اپیل کی اور کہا کہ علماء سے مل کر دلی خوشی ہوئی ، ملکی ترقی اور معاشرے کو انتشار سے بچانے میں علماء کا کردار کلیدی ہے۔
نگران وزیر اعلیٰ خیبر پختونخوا جسٹس(ر) سید ارشد حسین شاہ نے مزید کہا کہ مذہبی و مسلکی ہم آہنگی کے فروغ میں علماء کے کرادر کا معترف ہوں ، ملکی ترقی اور خلق خدا کی بھلائی کے لیے ہم نے مشترکہ کردار ادا کرنا ہوگا، علماء کو درپیش مسائل کو ترجیحی بنیادوں پر حل کیا جائے گا۔
