افغان طالبان نے کوروناوائرس کےحوالےسےکام کرنےوالےعالمی اداروں اوران کےکارکنوں کےتحفظ کاوعدہ کرتےہوئےانہیں عالمی وبا سے لڑنے میں تعاون کا اعلان کردیاہے ۔

بین الاقوامی خبررساں ادارے کی رپورٹ کے مطابق طالبان نےایک بیان میں صحت کےشعبےمیں کام کرنےوالے اداروں پرزور دیا ہے کہ وہ ان کےزیرکنٹرول علاقوں میں ادویات، طبی امداد اور ضروری مشینری بھیج دیں۔

 طالبان کی جانب سےبیان میں کہاگیاہےکہ ہمارےبرادرکاروباری حضرات اپنی اسلامی اورانسانی ذمہ داری کی روشنی میں بحران کے وقت میں اپنےساتھ والےلوگوں سےتعاون کریں۔

رپورٹ کےمطابق طالبان نےبیان میں کہاکہ وائرس خدا کی نافرمانی اورگناہوں کی سزاہے۔

طالبان کی جانب سےعالمی اداروں کوملک میں کورونا وائرس کےخلاف طبی امدادجاری رکھنےکی اجازت کو مثبت خیال کیاجارہاہے کیونکہ ماضی میں اس طرح کی پالیسی نہیں اپنائی گئی۔

دوسری جانب افغانستان میں یورپی یونین کےخصوصی نمائندے رولینڈ کوبیا نے مطالبہ کیا تھا کہ کورونا وائرس کے بڑھتے ہوئے خطرات کے پیش نظر مکمل جنگ بندی کی جائے۔

رولینڈ کوبیان نے طالبان کومخاطب کرتےہوئےاپنے بیان میں کہا تھا کہ کورونا وائرس کےخلاف ہر کسی کی مدد کرنی چاہیے جو ان کا حق ہے اور بہتر مدد کا پہلا قدم مکمل جنگ بندی ہے۔انہوں نے مزید کہا کہ انسانی ہمدردی کے کاموں میں رکاوٹیں نہ ڈالیں، مکمل تحفظ کو یقینی بنائیں، حکومت کے ساتھ رابطہ اور تعاون کریں ۔

افغانستان کےصدراشرف غنی کےقریبی ساتھی وحیدعمرنےیورپی یونین کےنمائندہ خصوصی کے بیان کاخیرمقدم کرتےہوئے طالبان سے مطالبہ کیاتھاکہ وہ حملےروکیں اورطبی عملےکومخدوش علاقوں میں جانےکی اجازت دیں۔

 طالبان نے 2019میں انٹرنیشنل کمیٹی آف ریڈ کراس اورعالمی ادارہ صحت (ڈبلیو ایچ او)پرمشتبہ سرگرمیوں کا الزام عائدکرتےہوئے پابندی عائد کردی تھی تاہم بعدمیں پابندی کوختم کردیاتھا۔

 واضح رہےکہ افغانستان میں اب تک کورونا وائرس سےمتاثرہ افرادکی تعداد  22 ہیں جن میں سے 1مریض صحت یاب ہوچکاہے   جبکہ باقی تمام مریض آئسولیشن وارڈ میں زیر ِعلاج ہیں ۔