سعودی عرب  نے فلسطینیوں کی نسل کشی پر عالمی عدالت انصاف کے فیصلے کا خیرمقدم کیا ہے۔

بین الاقوامی خبررساں ادارے کے مطابق   سعودی عرب کی جانب سے فلسطینیوں کی نسل کشی  کے خلاف عالمی عدالت انصاف کے ابتدائی فیصلے کا خیرمقدم کیا گیا ہے۔

سعودی دفتر خارجہ کی جانب سے جاری بیان میں کہا گیا ہے کہ فلسطینیوں کی اجتماعی نسل کشی سے متعلق اقوام متحدہ کے معاہدے کی خلاف ورزیوں اور قابض اسرائیلی حکام کے اقدامات کو پوری طرح سے مسترد کرتے ہیں۔

سعودی دفتر خارجہ کا کہنا ہے کہ عالمی عدالت انصاف کے ابتدائی فیصلے کا مقصد محصور غزہ پٹی میں فلسطینی عوام کی اجتماعی نسل کشی والے بیانات اور اقدامات کو روکنا ہے۔

سعودی عرب نے غزہ پٹی میں اسرائیلی حکام کی مسلسل خلاف ورزیوں  کے خلاف دعویٰ دائر کرنے سے متعلق جنوبی افریقہ  کی کوششوں کی تعریف کرتے ہوئے کہا کہ عالمی برادری کو غزہ میں جنگ بند کرانے، فلسطینی عوام کو تحفظ فراہم کرنے اور بین الاقوامی قانون کی تمام خلاف ورزیوں پر قابض اسرائیلی افواج کے احتساب کے حوالے سے مزید اقدامات کرنے ہوں گے۔

یاد رہے کہ عالمی عدالت انصاف نے جنوبی افریقہ  کی اسرائیل کے خلاف درخواست پر عبوری حکم جاری کرتے ہوئے جنگ زدہ غزہ کے شہریوں کے لیے ہنگامی اقدامات کرنے کا کہا ہے تاہم عدالت نے جنگ بندی کا حکم نہیں دیا۔