پاکستان کی بڑھتی آبادی ملک کے وسائل کو تباہ اور مسائل کو بڑھا رہی ہے۔

آبادی میں اضافے کے باعث خوراک، تعلیم، صحت اور روزگار کے مواقع کم ہوتے جا رہے ہیں، بڑھتی آبادی مستقبل میں خطرناک ہو سکتی ہے۔

آج ہر کوئی مہنگائی کی بات کرتا ہے، لیکن یہ نہیں سوچتا کہ اس کی وجوہات کیا ہیں؟ اس سے کس طرح نکلا جاسکتا ہے۔

پاکستان میں بڑھتی ہوئی آبادی نے ملکی وسائل بالخصوص محدود قدرتی وسائل پر سخت دباؤ ڈالا ہے۔

ادارہ شماریات کے مطابق ملک کی آبادی 2.55 فیصد سالانہ کی رفتار سے بڑھتے ہوئے 24 کروڑ 14 لاکھ 90 ہزار سے تجاوز کر چکی ہے جس کی ایک بڑی وجہ خاندانی منصوبہ بندی پر عمل درآمد نہ ہونا ہے۔

وسائل کی کمی کے باعث پاکستان کے 60 ملین لوگ غربت کی زندگی گزار رہے ہیں۔ ملکی ضروریات کو پورا کرنےکے لئے سالانہ 9 ارب ڈالر سے زیادہ مالیت کی خوراک درآمد کرنا پڑتی ہے۔

بڑھتی آبادی نے صحت اور تعلیم کےنظام پر بھی دباؤ بڑھا دیا ہے۔ 70 فیصد آبادی کو پرائمری ہیلتھ کیئرسینٹرز کی سہولت تک میسر نہیں۔ وفاقی وزارت تعلیم کی حالیہ رپورٹ کے مطابق 2 کروڑ 52 لاکھ بچے اسکولوں سے باہر ہیں۔

ماہرین کے مطابق تیزی سے بڑھتی ہوئی آبادی کو مناسب سطح پر لانے کے لیے پرائیویٹ سیکٹر اور کمیونٹی مڈوائف کو خاندانی منصوبہ بندی پر مل کر کام کرنا ہو گا۔

آبادی کو کنٹرول کرنے اور وسائل کو بڑھائے بغیر مسائل سے چھٹکارہ پانا ممکن نہیں ۔