سال 2024 کا پہلا اور مکمل سورج گرہن 08 اپریل کو ہوگا جو کہ 9 اپریل تک جاری رہے گا۔

رپورٹس کے مطابق سورج گرہن میکسیکو سے شروع ہوگا اور ٹیکساس، اوکلاہوما، آرکنساس، مسوری، الینوائے، کینٹکی، انڈیانا، اوہائیو، پنسلوانیا، نیویارک، ورمونٹ، نیو ہیمپشائر سے ہوتا ہوا کینیڈا پہنچے گا۔

سورج گرہن کے دوران، امریکہ کی زیادہ تر ریاستوں میں مکمل اندھیرا چھائے گا، جس کی وجہ سے سینکڑوں اسکولوں کو جلد بندش کا اعلان کیا جائے گا۔

اس کے علاوہ، ٹینیسی اور مشی گن کے کچھ حصے مکمل سورج گرہن کا مشاہدہ کریں گے، جو کل 4 گھنٹے اور 39 منٹ تک جاری رہے گا۔

دوسری جانب پاکستان اور بھارت میں سورج گرہن کے نظر آنے کا کوئی امکان نہیں ہے جو کہ پاکستانی وقت کے مطابق رات 8 بج کر 42 منٹ پر شروع ہوگا جو کہ رات 11 بج کر17 منٹ پر عروج پر ہوگا جب کہ اس کا اختتام 9 اپریل کی رات ایک بج کر 52 منٹ پر ہوگا۔

اس حوالے سے سائنسدانوں کا کہنا ہے کہ 8 اپریل کو ہونے والا سورج گرہن سال کا طویل ترین گرہن ہوگا جو کہ آخری بار 50 سال قبل دیکھا گیا تھا اور اس سال دوبارہ اس کا مشاہدہ کرنے کا موقع ملے گا۔

سورج گرہن کیسے ہوتا ہے؟

سائنس دانوں کا کہنا ہے کہ جب چاند زمین اور سورج کے درمیان آتا ہے تو تھوڑی دیر کے لیے اندھیرا چھا جاتا ہے۔

اگر چاند بالکل زمین اور سورج کے درمیان آتا ہے، اور سورج کو مکمل طور پر ڈھانپ لیتا ہے، تو اس کے نتیجے میں مکمل سورج گرہن ہوتا ہے۔

اس رجحان کی وجہ سے سورج کی شعاعیں زمین کی سطح تک نہیں پہنچ سکتیں اور کچھ علاقوں میں مکمل اندھیرا چھا جاتا ہے جسے مکمل سورج گرہن کہا جاتا ہے۔