تربوز کو موسم گرما کا ایک شاندار تحفہ قرار دیا جاتا ہے اس کی وجہ یہ ہے کہ تربوز کو قدرت نے گرمیوں میں اس لیے پیدا کیا ہے کیونکہ یہ اس موسم میں نہ صرف آپ کی پیاس بجھاتا ہے بلکہ گرمیوں کے امراض سے تحفظ بھی فراہم کرتا ہے۔

اس پھل کی سب سے خاص بات اس میں پانی کی مقدار ہے یعنی تربوز کا تیز گلابی گودا یا پورا پھل بیانوے فیصد پانی پر مشتمل ہوتا ہے، اس پانی میں پو ٹاشیم کی کثیر مقدار موجود ہوتی ہے، پوٹاشیم اس پانی کو جسم کے اندر نہ صرف برقرار رکھتا ہے، بلکہ آپ کی پیاس بھی بجھاتا ہے اور اس کے ساتھ یہ پانی جسم کے ہر خلیے تک جو نمی درکار ہوتی ہے وہ بھی فراہم کرتا ہے۔

تربوز میں بعض ایسے فلیوونولز مرکبات دریافت ہوئے ہیں جو کہ پورے نظام ہاضمہ جس میں  معدے،  آنتیں اور جگرشامل ہیں ان کو فائدہ پہنچاتے ہیں یہی وجہ ہے کہ یہ ہاضمے کے لیے ایک نہایت ہی خوش ذائقہ اور مفید ٹانک ہے۔

تربوز کو خوراک میں شامل کرنے کا سب سے بڑا فائد یہ ہے کہ اس میں بعض اجزاء خون کی شریانوں کو پرسکون رکھنے کے ساتھ کشادہ رکھتے ہیں اس طرح یہ امراض قلب کے حملے سے بھی بچاتے ہی یہی وجہ ہے کہ تربوز کو دل کا دوست بھی کہاجاتا ہے۔

تربوز حاملہ خواتین کے لیے بھی یہ ایک بہترین پھل ہے حاملہ خواتین میں چونکہ ایک اور جان بھی نمو پارہی ہوتی ہے تو نہ صرف بچے بلکہ ماں کو بھی کئی اہم غذا ئی اجزاء کی ضرورت ہوتی ہے تو یہ حاملہ خواتین کے لیے بھی ایک بہترین غذائی ٹانک کا کام کرتا ہے اور مارننگ سکنس یعنی صبح بیدار ہونے کے بعد جو طبیعت کی خرابی ہوتی ہے اسے بھی روکتا ہے۔

جو حضرات یہ کہتے ہی کہ ورزش کرنے یا کسی جسمانی سرگرمی کے بعد  ان کے ہاتھ پیروں میں اینٹھن ہوتی ہے یا تکلیف ہوتی ہے تو تربوز اس کا ایک بہترین علاج ہے وجہ اس کی یہ ہے کہ اس کے اندر شامل کچھ اجزاء آپ کے پٹھوں سمیت پورے جسم کو آرام دہ حالت میں رکھتے ہیں اور  تکلیف کو دور کر کے پٹھوں کا تقویت پہنچاتے ہیں۔