لاہور: وزیراعلیٰ پنجاب مریم نواز شریف نے ناقص کارکردگی پر انڈسٹریل اسٹیٹس کے سربراہ کو تبدیل کرنے کا حکم دے دیا۔
وزیراعلیٰ مریم نواز کی زیر صدارت اسپیشل اکنامک زونز کے امور سے متعلق اجلاس منعقد ہوا جس میں اسپیشل اکنامک زون میں دستیاب کاروباری سہولیات کا جائزہ لیا گیا۔
اجلاس میں وزیر اعلیٰ مریم نواز نے پنجاب میں انڈسٹری کے فروغ کے اہداف کی حصول میں ناکامی پر برہمی کا اظہار کیا اور اہداف پورا کرنے میں ناکامی اور ناقص کارکردگی پر انڈسٹریل اسٹیٹس کے سربراہ اور بورڈز کو تبدیل کرنے کا حکم دے دیا۔
اس موقع پر وزیراعلیٰ پنجاب نے گفتگو کرتے ہوئے کہا کہ انڈسٹریل اسٹیٹس کے سربراہ اور ٹیم کا پرفامنس آڈٹ کرایا جائے گا، انڈسٹری کو سہولتیں دے کر ماضی کی کوتاہیوں کا ازالہ کریں گے۔
مریم نواز نے مزید کہا کہ انڈسٹریل اسٹیٹ کو انہی مقاصد کے لئے استعمال کیا جائے، جن کے لئے قائم کی گئی ہیں، انڈسٹریل اسٹیٹ کو پلگ اینڈ پلے ماڈل پر قائم کرنا چاہتے ہیں اور انڈسٹری کے قیام کے طریقہ کار کو آسان اور تیز ترین بنا یا جائے گا۔
واضح رہے کہ اجلاس میں سینیٹر پرویز رشید، سینئر صوبائی وزیر مریم اورنگزیب، صوبائی وزیر اطلاعات عظمیٰ زاہد بخاری، ایم پی اے ثانیہ عاشق، چیف سیکریٹری زاہد اختر زمان، سیکریٹری خزانہ مجاہد شیر دل، سیکریٹری انڈسٹری احسان بھٹہ اور دیگر حکام نے شرکت کی۔
