چیف آف آرمی اسٹاف جنرل عاصم منیر سے سعودی عرب کے وزیر برائے سرمایہ کاری خالد بن عبدالعزیز الفلیح کی ملاقات ہوئی ہے۔

پاک فوج کے شعبہ تعلقات عامہ (آئی ایس پی آر) کے مطابق سعودی عرب کا اعلیٰ سطح کا وفد بھی آرمی چیف جنرل عاصم منیر کے ساتھ ملاقات میں شریک ہوا۔

آئی ایس پی آر نے بتایا کہ آرمی چیف اور سعودی وزیر سرمایہ کاری کی ملاقات میں باہمی دلچسپی کے امور بالخصوص دونوں برادر ممالک کے درمیان مختلف شعبوں میں تعاون کے فروغ پر غور کیا گیا۔

ترجمان پاک فوج کا کہنا تھا کہ ملاقات کے دوران خادم الحرمین شریفین شاہ سلمان بن عبدالعزیز اور ولی عہد کی جانب سے پاکستان کے لیے مسلسل حمایت و اعانت پر آرمی چیف نے تشکر کا اظہار کیا۔

اس موقع پر آرمی چیف نے پاکستان کے عوام کے دلوں میں سعودی عرب کے لیے پائے جانے والے گہرے احترام اور اخوت کے جذبات کو اجاگر کیا۔

آئی ایس پی آر نے مزید بتایا کہ آرمی چیف جنرل عاصم منیر نے سعودی تجاری وفد کو مکمل حمایت کی یقین دہانی کرائی اور کہا کہ سعودی وفد کا دورہ پاکستان دونوں ممالک کے گہرے برادرانہ تعلقات کا عکاس ہے، توقع ہے اس دورے سے دونوں ممالک کو فائدہ ہوگا۔

سعودی وفد کا دورہ پاکستان

سعودی سرمایہ کاروں کا وفد وزیر سرمایہ کاری خالد بن عبدالعزیز کی قیادت میں پاکستان کے تین روزہ دورے پر اسلام آباد پہنچ گیا۔

نور خان ایئربیس پر وفاقی وزراء مصدق ملک، جام کمال خان اور عبدالعلیم نے سعودی وفد کا استقبال کیا، تاہم وفد میں توانائی، کان کنی، معدنیات، زراعت، کاروبار، سیاحت، صنعت اور افرادی قوت سمیت مختلف شعبوں کے نمائندے شامل ہیں۔

شیڈول کے مطابق سعودی وفد پاکستانی کمپنیوں سے بزنس ٹو بزنس ملاقاتیں کرے گا اور دورے کے دوران متعدد معاہدوں پر دستخط بھی کیے جائیں گے۔