پاکستان کی معروف اداکارہ حنا بیات نے انکشاف کیا ہے کہ بالی ووڈ اسٹار عامر خان نے میرے شو کا فارمیٹ چوری کیا۔

حال ہی میں پاکستان کی معروف اداکارہ حنا بیات نے نجی ٹی وی چینل کے شو میں شرکت کی جہاں انہوں نے انکشاف کیا ہے کہ بھارتی اداکار عامر خان کا پروگرام ’ستیہ میں وجیتے‘ جو بھارتی نجی ٹی وی چینل پر نشر ہوا کرتا تھا، ان کے پروگرام کے فارمیٹ کو چوری کر کے بنایا گیا تھا۔

انہوں نے کہا کہ عامر خان کے اس شو کا تصور (کانسیپٹ) اور سیٹ ڈیزائن تک ان کے پروگرام سے ملتا جلتا تھا، جس پر ان کی ٹیم کے کئی افراد حیران رہ گئے تھے۔

اداکارہ نے کہا کہ انہیں خوشی ہے کہ انہیں اس پروگرام کے ذریعے سماجی مسائل پر بات کرنے اور بہت سی کہانیاں لوگوں کو بیان کرنے کا موقع ملا۔ ان کا کہنا تھا کہ لوگوں میں شعور اجاگر کرنا ان کے لیے سب سے بڑی کامیابی ہے۔

واضح رہے کہ اداکارہ حنا بیات نے اپنے کیریئر کا آغاز ایک میزبان کے طور پر کیا اور سماجی مسائل پر مبنی پہلا پروگرام پیش کیا، جس میں ممنوعہ موضوعات پر بات چیت کی گئی۔ ان کے اس اقدام سے کئی لوگوں کو مسائل کے حل اور شعور حاصل کرنے میں مدد ملی۔ بعد میں انہوں نے اداکاری کے میدان میں قدم رکھا اور وہاں بھی کامیابی سمیٹی۔