صدر مملکت آصف علی زرداری اور وزیر اعظم محمد شہباز شریف نے صوبہ خیبرپختونخوا کے ضلع شمالی وزیرستان کے علاقے حسن خیل میں افغانستان سے فتنۃ الخوارج دہشت گردوں کی دراندازی کی کوشش کو ناکام بنانے پر سیکیورٹی فورسز کو زبردست خراج تحسین پیش کیا ہے۔

صدر مملکت آصف علی زرداری نے بروقت کارروائی کرتے ہوئے 54 دہشت گردوں کو جہنم واصل کرنے پر سیکیورٹی فورسز کی بہادری اور پیشہ ورانہ صلاحیتوں کی بھرپور تعریف کی۔

صدر مملکت نے کہا کہ پاکستان کی بہادر سیکیورٹی فورسز اپنی سرحدوں کی حفاظت کے لیے ہمہ وقت تیار ہیں، اور دہشت گردوں کی دراندازی ناکام بنانا ایک بڑی قومی کامیابی ہے۔

انہوں نے دہشت گردی کے مکمل خاتمے اور ملکی سرحدوں کے تحفظ کے عزم کا اعادہ بھی کیا۔

مزید پڑھیں: شمالی وزیرستان میں خارجی دہشت گردوں کی دراندازی ناکام، 54 خارجی دہشت گرد جہنم واصل

دوسری جانب وزیر اعظم محمد شہباز شریف نے بھی اس شاندار آپریشن پر سیکیورٹی فورسز کو سراہتے ہوئے کہا کہ فورسز نے اعلیٰ پیشہ ورانہ مہارت کا مظاہرہ کرتے ہوئے دشمن کے ناپاک عزائم کو ناکام بنایا۔

وزیر اعظم نے کہا کہ دہشت گردی کے خلاف جنگ میں پوری قوم اپنی سیکیورٹی فورسز کے ساتھ کھڑی ہے۔

وزیر اعظم شہباز شریف نے مزید کہا کہ پاکستان کی سیکیورٹی فورسز ملک کی سرحدوں کے دفاع اور دہشت گردی کی لعنت کے خاتمے کے لیے اپنے عزم میں غیر متزلزل ہیں۔

انہوں نے کہا کہ یہ کامیاب کارروائیاں اس امر کی نشاندہی کرتی ہیں کہ پاکستان دہشت گردی کے خلاف جنگ میں مسلسل اہم کامیابیاں حاصل کر رہا ہے اور دشمن کے منصوبے ناکام بنا رہا ہے۔