اسلام آباد: وفاقی وزیر داخلہ محسن نقوی سے برطانیہ کے وزیر خارجہ ڈیوڈ لیمی نے ملاقات کی، وزارت داخلہ آمد پر وزیر داخلہ محسن نقوی نے برطانوی وزیر خارجہ ڈیوڈ لیمی کا خیر مقدم کیا۔

دونوں رہنماؤں نے ملاقات  میں پاکستان، برطانیہ کے تعلقات،  دوطرفہ تعاون اور ترقیاتی شراکت داری پر تبادلہ خیال کیا۔

محسن نقوی نے ملاقات کے دوران گفتگو کرتے ہوئے کہا کہ پاکستان دہشتگردی کے خلاف جنگ میں آہنی دیوار کی طرح کھڑا ہے،  برطانیہ کے ساتھ تعلقات اور باہمی تعاون کو آگے بڑھانے کے خواہاں ہیں۔

اس موقع پر وزیر داخلہ نے اپ اسکیل پروگرام کے تحت خصوصی تعاون پر برطانوی حکومت کے اقدام کو سراہتے ہوئے کہا کہ اپ اسکیل پروگرام منظم جرائم کی روک تھام میں کلیدی کردار ادا کر رہا ہے۔

 محسن نقوی کا یہ بھی کہنا ہے کہ پروگرام کے تحت  غیر قانونی امیگریشن، بچوں سے متعلق آن لائن ہراسانی، میوچوئل لیگل اسسٹنس و ایکسٹراڈیشن، کریمنل ریکارڈ کے تبادلے، سیکس آفنڈر مینجمنٹ، غیر قانونی فنڈنگ اور انسداد منشیات کے شعبوں پر باہمی اشتراک سے  کام کیا جا رہا ہے۔

یہ بھی پڑھیں : برطانوی وزیر خارجہ پاک بھارت کشیدگی پر بات چیت کیلئے اسلام آباد پہنچ گئے

وفاقی وزیر داخلہ نے کہا کہ اپ اسکیل پروگرام کے تحت دونوں ممالک کے مابین سریس اور منظم جرائم کی روک تھام  میں تعاون کے  اچھے نتائج سامنے آ رہے ہیں، جبکہ نیشنل کرائم ایجنسی کے تعاون سے اے این ایف نے 4.3 ٹن افیون پکڑی ہے جس کی مالیت 22 ملین پاؤنڈ بنتی ہے۔

دوسری جانب برطانوی وزیر خارجہ نے افغان مہاجرین کی برطانیہ منتقلی میں سہولت فراہم کرنے پر پاکستان سے تشکر کا اظہار کرتے ہوئے کہا کہ خوشی ہے کہ اپ اسکیل پروگرام کامیابی سے جاری ہے۔

 وزیر مملکت داخلہ طلال چوہدری، برطانوی ہائی کمشنر جین میریٹ، وفاقی سیکرٹری داخلہ، ڈی جی ایف آئی اے اور برطانیہ کے اعلی حکام بھی اس موقع پر موجود تھے۔