معروف میزبان نادیہ خان نے ایئر وائس مارشل اورنگزیب سے قریبی رشتے کا دعویٰ کردیا جس پر صارفین نے انہیں آڑے ہاتھوں لے لیا۔

آپریشن ’’بنیان مرصوص‘‘ میں پاک فضائیہ کی شاندار کامیابی کے بعد ایئر وائس مارشل اورنگزیب احمد ملک بھر میں سب سے زیادہ زیرِ بحث فوجی افسر بن گئے ہیں۔

یہ آپریشن بھارت کے ’’آپریشن سندور‘‘ کے جواب میں کیا گیا جس نے پاکستان کی دفاعی صلاحیت کو واضح طور پر دنیا کے سامنے پیش کیا۔

ایئر وائس مارشل اورنگزیب احمد نے ایئر چیف مارشل ظہیر احمد بابر سدھو کی جانب سے میڈیا بریفنگ میں شرکت کی اور ان کی پیشہ ورانہ شخصیت اور پرکشش انداز نے انہیں یکدم سوشل میڈیا کا نیا ’’نیشنل کرش‘‘ بنادیا۔

اس موقع پر معروف میزبان نادیہ خان نے اپنے مارننگ شو ’’رائز اینڈ شائن‘‘ میں اورنگزیب احمد سے متعلق ذاتی تعلقات پر مبنی انکشافات کیے جس سے نئی بحث چھڑ گئی۔

نادیہ خان نے شو میں اپنے شوہر فیصل راؤ اور ایئر وائس مارشل اورنگزیب کی 1989 کی ایک تصویر بھی دکھائی۔

انہوں نے کہا ’’جب میری فیصل سے شادی ہوئی تو انہوں نے بتایا کہ ان کے تین بھائی ہیں لیکن پھر کہا کہ میرا ایک اور بھائی اورنگزیب بھی ہے جو ایک زبردست فائٹر پائلٹ ہے۔

انہوں نے بتایا ’’وہ دونوں گھنٹوں فون پر بات کرتے تھے۔ جب میں ان سے ملی تو وہ صرف پاکستان کی بات کرتے تھے ان کی حب الوطنی متاثر کن ہے‘‘۔

نادیہ خان کہتی ہیں ’’فیصل ہمیشہ کہتے ہیں کہ میں چاہتا ہوں کہ میرا بیٹا اورنگزیب جیسا بنے، مجھ جیسا نہیں‘‘۔

نادیہ خان کے اس انکشاف پر سوشل میڈیا پر ملے جلے ردعمل دیکھنے میں آئے۔ کئی صارفین نے انہیں تنقید کا نشانہ بنایا کہ وہ صرف شہرت حاصل کرنے کے لیے ایئر وائس مارشل سے تعلق جوڑ رہی ہیں۔

ایک صارف نے لکھا ’’ناکامی میں کوئی اپنا نہیں ہوتا، کامیابی ملتے ہی سب رشتے دار بن جاتے ہیں‘‘۔

کسی نے سوال اٹھایا ’’کیا آپ کے پاس اورنگزیب کے ساتھ کوئی حالیہ تصویر بھی ہے؟‘‘۔

ایک اور نے تبصرہ کیا ’’کیا اورنگزیب صاحب کو پتا ہے کہ آپ کے شوہر ان سے کتنی لمبی فون کالز کرتے تھے؟‘‘۔

کچھ صارفین نے مذاق میں کہا ’’نادیہ کو کوئی تحفہ دے دو‘‘۔ اور کچھ نے ان کی ساکھ پر سوال اٹھاتے ہوئے کہا ’’یہ سب وہ محض خبروں میں رہنے کے لیے کر رہی ہیں‘‘۔