نئی دہلی: بھارتی ریاست ہماچل پردیش میں فوجی بس پر ہونے والے حملے اور اس میں ہونے والی ہلاکتوں کو مودی سرکار اور بھارتی فوج کی جانب سے دبائے جانے کا انکشاف ہوا ہے۔

ذرائع کے مطابق 26 مئی 2025 کو ہماچل کے علاقے کمار ہٹی ریلوے اسٹیشن کے قریب ایک فوجی بس کو نشانہ بنایا گیا جس کے نتیجے میں کئی فوجی اہلکار ہلاک ہوئے۔

ذرائع کا کہنا ہے کہ بھارتی حکومت نے حسب روایت اس واقعے کو چھپانے کے لیے میڈیا پر مکمل پابندی عائد کردی۔ چند لمحوں کے لیے ایک بھارتی نیوز چینل نے خبر نشر کی تاہم اسے بھی کچھ دیر بعد ہٹا دیا گیا۔ یہاں تک کہ “ٹائمز آف انڈیا” جیسے بڑے میڈیا ہاؤس نے بھی یہ خبر اپنی ویب سائٹ پر شائع کرنے کے بعد فوری طور پر ڈیلیٹ کردی۔

ذرائع کا دعویٰ ہے کہ مودی سرکار نے اپنی روایتی پالیسی اپناتے ہوئے بھارتی فوجی جوانوں کی ہلاکتوں کو چھپانے کی کوشش کی اور اپنے وفادار میڈیا، جسے “گودی میڈیا” کہا جاتا ہے، کو خاموش کرا دیا۔

ایک دفاعی تجزیہ کار کے مطابق بھارتی فوجیوں کو “بطور ہتھیار” استعمال کیا جا رہا ہے اور مرنے کے بعد ان کا نام تک لینا گوارا نہیں کیا جاتا۔

مودی حکومت کی میڈیا کنٹرول کی پالیسی نئی نہیں۔ “آپریشن سندور” کے دوران بھارتی میڈیا نے جھوٹے دعوے کرتے ہوئے کراچی بندرگاہ کی تباہی کی خبریں نشر کیں جن کی بعد ازاں فیکٹ چیک کے بعد تردید کی گئی اور تمام نشریات واپس لے لی گئیں۔

اسی طرح حالیہ دنوں میں بھارتی فوج نے ایک ویڈیو شیئر کی جس میں دعویٰ کیا گیا کہ دشمن کا میزائل حملہ ناکام بنایا گیا تاہم بعد میں یہ انکشاف ہوا کہ وہ ویڈیو دراصل خود بھارتی میزائل کی تھی۔ جھوٹ بے نقاب ہونے پر یہ ویڈیو بھی فوج کے آفیشل ایکس (سابقہ ٹوئٹر) اکاؤنٹ سے حذف کردی گئی۔

بین الاقوامی میڈیا خصوصاً الجزیرہ نے بھی بھارتی میڈیا کی جھوٹی رپورٹنگ پر تفصیلی روشنی ڈالی۔ رپورٹ میں بتایا گیا کہ این ڈی ٹی وی نے دعویٰ کیا تھا کہ پاکستانی ٹینک راجستھان کی طرف بڑھ رہے ہیں تاہم بعد میں یہ خبر بھی ہٹا دی گئی۔

دیگر چینلز جیسے ٹائمز ناؤ، ریپبلک ورلڈ، نیوز نائن اور انڈیا ٹی وی نے نہ صرف جھوٹی خبریں چلائیں بلکہ ان میں سے بعض نے بعد ازاں معافی بھی مانگی۔

الجزیرہ کی رپورٹ کے مطابق بھارتی میڈیا نے پاکستانی پائلٹ کی گرفتاری، جے ایف-17 اور ایف-16 طیاروں کی تباہی جیسے بے بنیاد دعوے بھی کیے جو مکمل طور پر جھوٹے ثابت ہوئے۔

دفاعی ماہرین کا کہنا ہے کہ بھارتی حکومت میڈیا کو اپنے سیاسی اور جنگی مقاصد کے لیے استعمال کر رہی ہے۔ ان کے بقول میڈیا پر کنٹرول اور سچ کا گلا گھونٹنا، دراصل بھارتی دفاعی پالیسی کی ناکامی کا اعلانیہ اعتراف ہے۔